Թուրք հոդվածագիրն անդրադարձել է Թուրքիայի պատմության մութ էջերին

Թուրքիայում շարունակում են ջրի երես դուրս գալ պատմության մութ էջերը: Թուրքական «Աքշամ» պարբերականի հոդվածագիր Սոներ Արըքանօղլուն իր հոդվածում անդրադարձել է ոստիկանության` 1963 թ. առաջ ընկած ժամանակաշրջանի փաստաթղթերին: Ինչպես հաղորդում է «Արմենպրես»–ը` փաստաթղթերում անդրադարձ է կատարվել թուրք գրողներ Սաբահաթթին Ալիի, Նազըմ Հիքմեթի հարցաքննություններին և սպանությանը, Դերսիմի դեպքերին:

Մոտ 50 տարվա պատմություն ունեցող փաստաթղթերում խոսվում է թուրք գրող Նազըմ Հիքմեթի մասին, ով իր կյանքի զգալի մասն անց էր կացրել թուրքական բանտերում, ինչից հետո պետական հալածանքի պատճառով ստիպված էր եղել հեռանալ Մոսկվա, որտեղ էլ մահացել էր:

Բացահայտված փաստաթղթերում ներկայացված է նաև մեկ այլ թուրք գրող Սաբահաթթին Ալիի սպանությունը, որն իրականացվել է Թուրքիայի Ազգային հետախուզական ծառայության ներկայացուցչի կողմից:

Դերսիմի կոտորածների վերաբերյալ փաստաթղթերում կա առանձին արձանագրություն` «Հայերեն ծիսակատարություններ» խորագրով: Արձանագրության մեջ խոսվում է այն մասին, որ Դերսիմի դեպքերից առաջ քաղաքում մի ստվար զանգված հայերենով տարատեսակ կրոնական ծիսակատարություններ էր անում:

1936-1937 թթ. Թուրքիայի Հանրապետության հիմնադիր Մուսատաֆա Քեմալ Աթաթուրքի թողտվությամբ կոտորած էր տեղի ունեցել տեղի հայ, քուրդ, ալևի, ասորի և հույն բնակչության նկատմամբ: Այս դեպքերին զոհ էին գնացել շուրջ հարյուր հազար մարդ: Ներկայում նրանց ժառանգները փոխհատուցում են պահանջում թուրքական կառավարությունից:

http://armenpress.am/arm/news/684635/turq-hodvatsagirn-andradardzel-e-turqiayi-patmutyan-mut.html