Իսրայելի շրջակա միջավայրի նախարար Գիլադ Էրդանը հունիսի 12-ին հայտարարել է, թե Իսրայել պետությունը պետք է փոխի իր քաղաքականությունն ու որպես Ցեղասպանություն ճանաչի 1915 թ. Օսմանյան Թուրքիայի կողմից հայերի նկատմամբ իրականացրած մասսայական սպանությունները:
Ինչպես հաղորդում է Jewish Journal-ը, վկայակոչելով Reuters գործակալությունը, վարչապետ Բենիամին Նեթանյահուի մտերիմ զինակից Գիլադ Էրդանը խորհրդարանում պատասխանել է ընդդիմադիր պատգամավորների հարցերին: «Կարծում եմ` արժե, որ Իսրայելի կառավարությունը պաշտոնապես ճանաչի հայ ժողովրդի նկատմամբ իրականացված Հոլոքոստը»,- ասել է նախարարը:
Նախարարը հավելել է, թե իսրայելական պետությունը պաշտոնապես չի փոխել իր քաղաքականությունը հայկական ողբերգության հանդեպ` նշելով. «Մենք պարտավոր ենք աջակցել բաց եւ համակողմանի քննարկմանը, որը կվերլուծի տվյալներն ու փաստերը»:
Ըստ աղբյուրի` Իսրայելի ԱԳՆ խոսնակ Յիգալ Փալմորը նշել է, որ հայոց ողբերգական դեպքերի վերաբերյալ Իսրայելի դիրքորոշումը նույնն է` «դրանով պետք է զբաղվեն պատմաբանները, այն չպետք է դառնա քաղաքական շահարկումների առարկա»:
Leave a Reply