Զբոսաշրջիկների մեծ հոսք դեպի Անիի ավերակներ

Կարսից 42 կմ հեռավորության վրա և ներկայիս Օջաքլը գյուղի սահմաններում գտնվող հայկական հինավուրց մայրաքաղաք Անիի այցելուների թիվն օրեցօր ավելանում է:

Թուրքական «Իհլաս» լրատվական գործակալության փոխանցմամբ` Անին ցանկանում են տեսնել հատկապես արտասահմանցի զբոսաշրջիկները: Անի այցելողների մեջ մեծ թիվ են կազմում պատմաբանները, լրագրողները, հնագետներն ու լուսանկարիչները:

Կարս նահանգի Մշակույթի և զբոսաշրջության տնօրեն Հաքան Դողանայը հայտնելով, որ Անիի ավերակների նկատմամբ մեծ հետաքրքրություն են ցուցաբերում տեղացի և օտարերկրացի զբոսաշրջիկները, նշել է.

«Եղանակի տաքացմանը զուգահեռ` Անին հյուրընկալում է տեղացի և արտասահմանցի այցելուների: Վերջերս Անի այցելածների մեջ ուշադրություն են գրավել հատկապես չեխ և գերմանացի զբոսաշրջիկները: Անի եկած մեր հյուրերը մեծ բծախնդրությամբ են ընդունվում զբոսաշրջության բնագավառում աշխատողների կողմից, որոնք օգտակար են լինում այցելուներին: Կարսն աշխարհում այն հազվադեպ հանդիպող տեղերից մեկն է, որում մեծ թիվ են կազմում պատմական տեսարժան վայրերը»:

Նշենք, որ թեև սույն հրապարակման մեջ թվարկվում են Կարսի գրեթե բոլոր պատմական հուշարձանները, սակայն, ինչպես միշտ, բացակայում են «հայ» և «հայկական» բառերը:

Akunq.net