Իսրայէլի Քնեսեթի խօսնակ Ռեւին Ռիլուին երէկ Հայոց Ցեղասպանութեան նուիրուած քննարկման ընթացքին յայտարարած է, որ Իսրայէլ պարտաւոր է յիշելու մօտ 100 տարի առաջ թուրքերուն կողմէ սպաննուած մէկ միլիոնէ աւելի հայերը:
Ինչպէս կը տեղեկացնէ The Jerusalem post-ը, ան նաեւ զգուշացուցած է, որ անիկա պէտք չէ վերածուի թրքական կառավարութեան վրայ յարձակման:
«Մենք քաղաքակրթական պարտաւորութիւն ունինք` յիշելու միլիոնաւոր սպաննուած հայերը: Սակայն կ’արգիլուի քաղաքականացնել հարցը: Անիկա ուղղուած չէ Թուրքիոյ ներկայ վարչաձեւին դէմ: Մենք մեր ձայները պէտք է լսելի դարձնենք այն պարագաներուն, երբ թիրախ կ’ընտրուին այլ ազգեր»,- ըսած է ան:
Ռիլուին նշած է, որ անոնք, որոնք Երկրորդ համաշխարհայինի ժամանակ Հրէական հարցով որոշում կայացուցին, կը մտածէին աշխարհը կը լռէ, ինչպէս անիկա տեղի ունեցաւ հայերու պարագային: «Քնեսեթը չի կրնար արհամարհել այդ փաստը»,- ըսած է ան:
Իսրայէլի խորհրդարանին մէջ տեղի ունեցած լսումներու կազմակերպիչը` «Մերեց» կուսակցութենէն Զեհեւա Գալ-Օն, կոչ ըրած է ի վերջոյ ճանչնալու ցեղասպանութեան փաստը: Ան նշած է, որ Հոլոքոսթ վերապրած հրեաները պէտք է աւելի զգայուն ըլլան այլոց հետ տեղի ունեցած աղէտներուն հանդէպ:
Միակ պատգամաւորը, որ դէմ արտայայտուած է Իսրայէլի կողմէ Հայոց Ցեղասպանութեան ճանաչման, եղած է Ռոպերթ Տիբաեւ, որ նշած է, որ աւելի լաւ է հարցը ձգել պատմաբաններուն:
Leave a Reply