BBC-Ն փաստում է, որ ցեղասպանության զոհերի հուշարձանները գրավում են զբոսաշրջիկներին, սակայն ոչ մի խոսք Ծիծեռնակաբերդի մասին

Եվրոպայի առաջնության ժամանակ Անգլիայի հավաքականը այցելել է Օսվենցիմ քաղաքում գտնվող նացիստական համակենտրոնացման ճամբարների համալիրը, գրում է բրիտանական BBC-ն:

Մարզիչների և մարզիկների մի խումբ էլ Կրակովում այցելել էր այն գործարանը, որը պատկանել է Օսկար Շինդլերին: Սա առաջին դեպքը չէ, երբ ֆուտբոլիստները այցելել են ցեղասպանության զոհերի հուշարձաններ: Հոլանդիայի, Իտալիայի և նույնիսկ Գերմանիայի հավաքականները նույնպես այցելել են այնտեղ:

Ճամբարի հայտնի դարպասների մոտով, որտեղ գերմաներենով գրված է` «Աշխատանքը ազատ է դարձնում», անցել են արդեն միլիոնավոր մարդիկ:

Անցյալ տարի այն այցելել էին շուրջ 1.4 մլն մարդ, ինչը ռեկորդային թիվ է թանգարանային համալիրի պատմության մեջ: Վերջին տարիներին նման հուշարձանների նկատմամբ հետաքրքրությունը կտրուկ աճել է: Բոսնիան, Կամբոջան, Ռուանդան այժմ ընգրկվել են ցեղասպանության պատմության տուրիստական քարտեզի մեջ:

«Բի-Բի-Սի»ի փաստմամբ՝ անցյալ տարի Ռուանդա են այցելել շուրջ 40.000 զբոսաշրջիկներ, այդ թվում` բազմաթիվ ամերիկացիներ: Ամերիկացիների հետաքրքրությունը պայմանավորված է նաև հոլիվուդյան «Ռուանդա հյուրանոց» ֆիլմով, որը հիմնված է իրական փաստերի վրա:

Ինչպես նշում է պարբերականը, Ցեղասպանության զոհերի հուշարձանները գրավում են ոչ միայն մարզիկներին և զբոսաշրջիկներին, այլ նաև նորապսակներին, ովքեր իրենց հարսանեկան ճանապարհորդության ժամանակ հարգանքի տուրք են մատուցում ցեղասպանության զոհերին՝ այցելելով ցեղասպանության զոհերին նվիրված հուշահամալիրներ:

Հոգեբան և մշակութաբան Շիլի Քիգանը կարծում է, որ զբոսաշրջիկները հետաքրքրություն են ցուցաբերում նման վայրերի նկատմամբ, քանի որ ցանկանում են ընդլայնել իրենց մտահորիզոնը:

«Մարդիկ ուզում են նոր տպավորություններ: Միգուցե այս ամենում կա վանող բան, սակայն մարդկանց գրավում են նմանատիպ վայրերը, որոնք ստիպում են մտածել, թե ինչպես ենք մենք՝ մարդիկս, նման բաներ իրագործել»- ասել է հոգեբանը:

Հետաքրքիր է, որ բրիտանական առաջատար լրատվամիջոցի բավական ընդգրկուն հոդվածում չի հիշատակվում 20-րդ դարի առաջին և խոշորագույն ցեղասպանություններից մեկի՝ Հայոց ցեղասպանության  և դրան զոհ գնացածների հիշատակը հավերժացնող կոթողի՝ Ծիծեռնակաբերդի մասին:

http://tert.am/am/news/2012/06/12/genocide11/