«Քյուչյուքի հետ հայերի մասին ենք խոսել»

«Էրգենեքոնի» դատական գործի շրջանակներում դատվող Բանվորական կուսակցության (İşçi Partisi-İP) առաջնորդ Դողու Փերինչեքի որդին` Մեհմեթ Բորա Փերինչեքը, որը հայտնի է իր հայատյացությամբ և հայոց պատմությունը խեղաթյուրող գրքի հեղինակ է, հայտնել է, թե նույն գործով մեղադրյալ գեներալ-մայոր Վելի Քյուչյուքի հետ խոսել է Հայկական հարցի մասին:

Թուրքական «Թարաֆ» օրաթերթի փոխանցմամբ` երեկ Ստամբուլի 13-րդ ծանր քրեական հանցագործությունների դատարանում «Էրգենեքոնի» գործի շրջանակներում կայացել է 14 մեղադրյալների դատավարության 5-րդ նիստը:

Փերինչեքը պաշտպանական խոսքում անդրադարձել է այն մեղադրանքներին, որոնց համաձայն` 2003 թ. օգոստոսի 30-ին իր առաջնորդության տակ գտնվող Բանվորական կուսակցության երիտասարդական թևը և «Էրգենեքոնի» գործով ձերբակալված Ստամբուլի Ռասիստական օջախների նախկին նախագահ Լևենթ Թեմիզի ղեկավարության տակ գտնվող խումբը, Վելի Քյուչյուքի հրահանգով, ցույց են կազմակերպել Թաքսիմ հրապարակում: Ինչպես որ նշվել է մեղադրական ակտում, Փերինչեքը նախքան ցույցը հանդիպել է Վելի Քյուչյուքին: Այդ փաստն ընդունած Փերինչեքը դատական նիստում նշել է. «Վելի Քյուչյուքին հանձնեցի Հայկական հարցի վերաբերյալ իմ կատարած աշխատանքների մասին մի թղթապանակ: Քյուչյուքն էլ կարող է նման ցույց անելու առաջարկով հանդես եկած լինի: Հետո ի՞նչ»:  

Akunq.net