ԵՄ դիվանագետներն անհանգստացած են Թուրքիայի իսլամիստական կառավարությամբ

Անկարայում եւ Ստամբուլում հավատարմագրված Եվրամիության անդամ երկրների ներկայացուցիչները «խորապես անհանգստացած» են Թուրքիայի հետզհետե իսլամականացումով: Այս մասին, ինչպես հաղորդում է «Արմենպրես»-ը` վկայակոչելով թուրքական «Միլիեթ» թերթը, հայտնում է AFP լրատվական գործակալությունը:

Թուրքիայում աշխատող օտարերկրյա դիվանագետների հետ հանդիպումից հետո AFP-ի թղթակիցները հայտնել են, որ ԵՄ դիվանագետներն ամեն անցնող տարի ավելի են անհանգստացած Թուրքիայում իշխող իսլամիստների` գնալով աճող մարտական կեցվածքով:

«ԵՄ դիվանագետները Անկարային մեղադրում են կառավարության դեմ հեղաշրջում ծրագրելու հետ կապված հետաքննություններով ընդդիմադիրներին լռեցնելու եւ պետական դպրոցներում Ղուրանի դասաժամեր մտցնելու միջոցով երկրի աշխարհիկ կառուցվածքը վնասելու, կրոնական կրթության դպրոցներ ընդունվող երեխաների տարիքն իջեցնելու, իսլամն ու հղիության արհեստական կասեցումն արգելելու դեմ քննադատությունները ճնշելու մեջ», -հայտնում է AFP-ն:

ԵՄ ընդլայնման հարցերով հանձնակատար Ստեֆան Ֆյուլեն անցյալ չորեքշաբթի հայտարարել է, որ վերոնշյալ փաստերը խոչընդոտներ են Թուրքիայի` ԵՄ անդամակցության առաջ: ԵՄ-ի թուրքական պատվիրակության նախկին ղեկավար Մարկ Փերինին նշել է, որ կառավարության այդ գործողությունները ցույց են տալիս, որ Թուրքիայում պահպանողականները ճնշում են գործադրում ամեն տեսակի քննադատության նկատմամբ, եւ որ այդ երկրում կարծես ընդդիմությունն ամբողջությամբ վերացել է: Անկարայում աշխատող մի դիվանագետ ասել է. «Թուրքիայում կարծես քաղաքացիական հասարակություն կա, բայց այն վախենում է ձայն հանել: Մամուլն ուղղակի եւ անուղղակի ճանապարհներով գտնվում է իշխող Արդարություն եւ զարգացում կուսակցության հսկողության տակ, իսկ ընդդիմությունը խիստ թուլացած է»:

Ստամբուլում եվրոպացի մի դիվանագետ AFP-ին հայտնել է, որ աթեիստական հայացքների համար թուրք հայտնի դաշնակահար Ֆազիլ Սայի դեմ Թուրքիայում սկսված հետաքննությունը խայտառակություն է: «Հարցը միայն նրա դեմ դատական գործ բացելը չէ, այլ այն, որ կառավարությանը մոտ «Սաբահ» թերթը հերոսացրել է Սային թիրախ դարձրած մարդուն», -ասել է օտարերկրացի դիվանագետը:

http://armenpress.am/arm/news/694287/em-divanagetnern-anhangstacats-en-turqiayi-islamistakan.html