Ստամբուլում այսօր կբացվի Բալյանների ստեղծագործություններին նվիրված ցուցահանդես

Այսօր, Թուրքիայի ժամանակով ժամը 17.00-ին Ստամբուլի Բաքըրքյոյ շրջանի քաղաքապետարանին կից Արվեստի և քաղաքի թանգարանում կբացվի Օսմանյան պետության ժամանակաշրջանում 18-րդ և 19-րդ դարերին պատկանող Ստամբուլի բազմաթիվ նշանավոր կառույցների հեղինակ Բալյան հայկական գերդաստանի ստեղծագործություններին նվիրված լուսանկարչական ցուցահանդես:

Պոլսահայերի Hyetert կայքէջի փոխանցմամբ` սույն ցուցահանդեսի հանդիսավոր բացումը կանի Բաքըրքյոյի քաղաքապետ Աթեշ Ունալ Էրզենը: Ցուցահանդեսը կգործի մինչև սույն թվականի հուլիսի 2-ը` առավոտվա 9-ից մինչև երեկոյան 21.00-ը: Ցուցահանդեսի կազմակերպիչներն են Բաքըրքյոյի քաղաքապետարանը, պոլսահայ համայնքը, ինչպես նաև` Յեշիլքյոյի հայկական դպրոցի շրջանավարտների միությունը:  

Հիշեցնենք, որ արքունի ճարտարապետներ Բալյան գերդաստանի հեղինակած կառույցների մեջ են գտնվում այնպիսի նշանավոր շինություններ, ինչպիսիք են` Դոլմա Բահչե, Բեյլերբեյի, Չըրաղան սուլթանական պալատները, Սուրբ Աստվածածին հայկական եկեղեցին, «Ըհլամուր» կայսերական ապարանքը, «Բեյազեդ Սերասկեր» հրդեհի աշտարակը, Օրաթաքյոյի մզկիթը և այլն:

Akunq.net