Դիարբեքիրի քաղաքապետի խորհրդական. հարյուրամյակներ շարունակ մեր քաղաքում միասին են հնչել զանգերն ու ազանը

ԱՄՆ ՄԶԳ «Աջակցություն հայ-թուրքական հարաբերությունների բարելավմանը» ծրագրի շրջանակում հերթական անգամ Երեւանում է Թուրքիայից հյուրերի խումբը: Նրանց թվում է Դիարբեքիրի քաղաքապետի խորհրդական Շեյհմուս Դիքենը, ով պատասխանեց NEWS.am-ի հարցերին.

Պրն. Դիքեն, Դիարբեքիրի քաղաքապետ Օսման Բայդեմիրը հաճախ է հանդես գալիս հայերի եւ նրանց պատմության մասին բարեկամական հայտարարություններով: Ինչի՞ համար է քրդերին պետք պահպանել այդ հիշատակը:

Քանի որ հայերն այն ժողովուրդներից մեկն են, ովքեր ապրել են այդ տարածաշրջանում քրդերի հետ: Հարյուրամյակներ շարունակ Դիարբեքիրում զանգերն ու ազանը միասին են հնչել: Ինչպես եւ մենք` քրդերս ու մահմեդականներս, ունենք մեր իրավունքները, այնպես էլ հայերը, քանի որ մենք միասին ենք ապրել. մեր ձայնն ու շնչառությունը միախառնվել է:  Դրսում մենք ամեն ինչ միասին ենք արել: Կոստանդնուպոլսի պատրիարքի տեղապահ Արամ Աթեշյանը իմ դպրոցական ընկերներից է, մենք միասին հինգ տարի սովորել ենք: Ես հաճախ եմ նրա հետ հանդիպում, քանի որ մենք ընդհանուր հիշողություններ ունենք: Եւ ժողովրդի կողմից ընտրված քաղաքապետը գիտի այդ իրողությունների մասին: Այդ իսկ պատճառով նա հայերին նույն կերպ է վերաբերվում: Եւ հայերը, երբ եկել էին Դիրաբեքիր, անձամբ տեսան այդ հարաբերությունների արտահայտությունը:

Ո՞ւմ համար են այս խոսքերը, եթե Դիարբեքիրում գրեթե հայ չի մնացել:

Այդ կոչերը հնչում են ոչ միայն Դիարբեքիրում ապրող 1-2 հայ ընտանիքների համար, այլ ողջ աշխարհի հայերի, նաեւ Հայաստանի հայերի համար: Եթե ինչ-որ տեղ թեկուզ մեկ հայ է ապրում, մենք դիմում ենք նրան որպես հայրենակցի: Հիշեցնեմ, որ 2011թ. հոկտեմբերի 21-ին, երբ Դիարբեքիրում բացվեց  Սբ. Կիրակոս եկեղեցին, աշխարհի բոլոր կողմերից` Ամերիկայից, Կանադայից, Ավստրալիայից, Ֆրանսիայից, Հայաստանից  Դիարբեքիր էին ժամանել մեկուկես հազար հայեր, որոնք հանդիպել էին եկեղեցու  բակում:

Ինչպե՞ս են դիարբեքիրցի քրդերը վերաբերվում Արամ Տիգրանի երգերին:

Դիարբեքիրում փառատոններից մեկի ժամանակ, երգչի մահից մեկ տարի առաջ, նրան լսելու համար հինգ հարյուր հազար մարդ էր հավաքվել: Այդ ժամանակ քրդերենով ասաց.  «Դիարբեքիր, մենք երկար ժամանակ քեզ կարոտել էինք, իսկ հիմա դու եկար եւ գրկեցիր մեզ»: Քրդերը երբեք չեն մոռանա երկու հայի` մեկը Արամ Տիգրանն է, մյուսը մի քանի տարի առաջ մահացած Կարապետ Խաչոն, ով բնակվում էր Երեւանում: Այս երկու անձինք շատ բան են արել քրդական երաժշտության համար: Ինչո՞ւ նրանք իրենց կյանքը նվիրեցին դրան: Քանի որ մահվանից առաջ նրանց հայրերն ասել են` գիտեք, մեզ ցեղասպանությունից փրկել են քրդերը, մեր երախտագիտությունը արտահայտեք երաժշտությամբ:

Շնորհակալություն:

http://news.am/arm/news/108149.html