Իրան-Նախիջևան «փակ» սահմանն ու թավրիզյան հրճվանքը

Նախիջեւանը, որ ոճրագործության առումով հետեւողական հանցագործությամբ ու նախագծով հայաթափվեց, հայազրկվեց, անգամ հայկական մշակութային ներկայությունից գրեթե «մաքրվեց», ներկայիս ընդհանրությամբ պարտադրված Ադրբեջանի հետ ցամաքային կապ ունի միայն Իրանի տարածքով: Ու թեեւ այս հանգամանքը մասնագետների ու ականատեսների գնահատմամբ Նախիջեւանում տիրող բռնապետական պայմանների ու հակաժողովրդավարական իրավիճակի հետ առանձնակի կապ չունի, բայց եւ հաճախ է շահարկվում Իրան-Ադրբեջան հարաբերություններում:

Հերթական անգամ նախիջեւանյան թեման դարձել է ադրբեջանա-իրանական առանց այդ էլ ոչ բարվոք հարաբերությունների վատթարացման թեմա եւ ոչ այնքան տարածվող տեղեկությունների իսկության ու իրականությանը համապատասխանելու առումով, որքան այդ լուրերին տրվող արձագանքների գրեթե թշնամական նոտաների համատեքստում:

Իրան-Նախիջեւան սահմանի փակ լինելու մասին լուրերը երեկ ադրբեջանական մամուլում տարատեսակ մեկնաբանությունների առիթ էին տվել, ընդ որում` տեղեկության առաջնային աղբյուր էր նշվում իրանական ազգային հեռուստառադիոընկերությունը` թեհրանյան ռադիոյի հետ: Համաձայն այդ տեղեկատվության` իրանական ռադիոները տեղեկացրել են այդ լուրի մասին, բայց էականը հենց սահմանի փակ-բաց լինելը չէ, այլ այն, որ ադրբեջանական կողմում իրանական մամուլի հրապարակումներում «ոգեւորություն» են նկատել:

Ստացվում է, որ Իրանում ուրախ են Նախիջեւան-Ադրբեջան սահմանի փակ լինելու առնչությամբ: Ավելին` ադրբեջանական կողմում հատուկ ընդգծում են, թե Թավրիզի բնակչությունն է «հրճվել»` այդ տեղեկությունն իմանալով: Ու մինչ տեղեկությունը որեւէ կերպ ոչ հաստատվում էր, ոչ էլ հերքվում, ակնհայտ էր, որ առնվազն Թավրիզում հակաադրբեջանական տրամադրությունները մտահոգության տեղիք են տալիս Ադրբեջանում, թեեւ ադրբեջանական իշխանությունները առաձնակի ոչինչ կարծես չեն ձեռնարկում դրանց ուղղվածությունը փոփոխելու համար:

Երեկ արդեն ավելի ուշ Ադրբեջանի պետական սահմանային ծառայությունը կարճ ու ոչ հստակ հաղորդագրություն տարածեց, թե սահմանի փակման մասին «տեղեկությունը չի համապատասխանում իրականությանը»:

Ա. Հ.

http://azg.am/AM/2012060108