Թուրքական ազգայնականության և հակահայ տրամադրության հերթական դրսևորումը

Ինչպես տեղեկացնում է «Ակօս»-ը «Ada Gazetesi» թերթի պատասխանատու տնօրեն և սեփականատեր Շյուքրյու Աբանոզը իր դժգոհությունն է հայտնել, որ Քընալը կղզում 2010 թ. բացված մանկական զբոսայգին  կոչել են Հրանտ Դինքի անունով:

Թեև Շ. Աբանոզի` Իշխանաց կղզիների քաղաքապետարանին ու կայմակամությանն ուղարկած դիմումներն անպատասխան են մնացել, սակայն ուշագրավ են դրանցում տեղ գտած արտահայտությունները:

2010 թ. սեպտեմբերի 11 զբոսայգու բացումից անմիջապես հետո Շ. Աբանոզը երկու դիմում է ուղարկել կայմակամությանն ու քաղաքապետարանին: Իշխանաց կղզիների քաղաքապետարանին ուղղված դիմումում, որը քաղաքապետարանն ընդունել է 2010 թ. սեպտեմբերի 24-ին` 5531 թվով, տեղ են գտել հետևյալ արտահայտությունները. «Որպես կղզու բնակիչ` ով գիտի, որ հասարակական վայրը սովոաբար անվանակոչում են այն մարդու անունով, ով հասարակությանը կարողացել է որևէ նպաստ բերել, ցանկանում եմ իմանալ, թե ի՞նչ հիմնավորմամբ են մանկական զբոսայգին անվանում Հրանտ Դինքի անունով, ով երկրում և արտերկրում հանդես եկած ելույթներով թուրք ազգին մեղադրել է մարդկության պատմության համար ամենաամոթալի և ամենանվաստացուցիչ հանցանք համարվող ցեղասպանության մեջ և սպանվել հենց այդ արտահայտությունների պատճառով»:  

Իսկ կայմակամությանն ուղղած դիմումում Աբանոզը առաջ է քաշել ևս մեկ «հետաքրքիր» թեզ, ըստ որի` մանկական զբոսայգին շուտով վերածվելու է ցեղասպանության զբոսայգու. «Հրանտ Դինքը մի լրագրող է, ով փորձում էր թուրք ազգի ճակատին ցեղասպանության կնիքը խարանել: Քընալը կղզում, որտեղ մեծ թվով հայեր են բնակվում, որի պատճառով էլ այն կոչվել է Հայկական կղզի, ամեն տարի միջոցառումներ են կազմակերպվելու, որտեղ կարող են արտերկրացիների մասնակցություններ լինել, այդ մանկական զբոսայգին ժամանակի հետ վերածվելու է ցեղասպանության զբոսայգու: Քաղաքապետարանի խորհրդի կայացրած այս որոշումը խախտելու է Քընալու կղզու բնակիչների հանգիստը: Այս որոշումը թիրախ է ընտրում Քընալը կղզին և կղզու բնակիչներին»:

Թեև Աբանոզի պահանջները չեն բավարարել, սակայն այս դեպքը թուրք հասարակության մեջ իշխող տրամադրությունների ևս մեկ ցուցանիշն է:  Ցեղասպանի խարանը հանգիստ չի տալիս թուրք հասարակությանը: 1915 թ. տեղի ունեցածի վերաբերյալ յուրաքանյուր քննարկում, փաստի արձանագրում համարում են կեղծիք, հերյուրանք, սակայն որքան էլ փորձեն ժխտել, գլուխն ավազի մեջ թաղել, միևնույն է, իրականության հետ մի օր պետք է հաշվի նստեն:  

31.03.2012

Akunq. net