Էրդողանն ասել է «անճոռնի», բայց չի վիրավորել…

Թուրքական Vatan թերթի փոխանցմամբ՝ Թուրքիայի վարչապետ Ռեջեփ Էրդողանի փաստաբան Ահմեդ Օզելը գրություն է ուղարկել դատարան՝ կապված Կարսում ապամոնտաժված մարդկության հուշարձանի հետ: Հիշեցնենք, որ երբ Էրդողանն այդ հուշարձանն անվանեց «անճոռնի» (ucube), հուշարձանի քանդակագործ Մեհմեդ Աքսոյը դատի տվեց նրան:

Այս կապակցությամբ Օզելը նշել է, որ Աքսոյը չի կարող ուրիշներին պարտադրել իր գեղագիտական ճաշակը, և Էրդողանն ինքն է որոշում, թե արվեստի որ գործն է իր դուրը գալիս, իսկ որը՝ ոչ: Օզելը հավելել է, որ Էրդողանը տվյալ բառը (ucube) գործածել է հուշարձանի և ոչ թե դրա հեղինակի նկատմամբ: 

Ըստ Օզելի՝ թուրքերեն լեզվում ucube բառը գործածվում է նաև «տարօրինակ, անսովոր» իմաստով, ինչը նշանակում է, որ Էրդողանը որևէ վիրավորական արտահայտություն չի գործածել: 

Հիշեցնենք, որ 2011 թ. հունվարի սկզբին Թուրքիայի վարչապետ Էրդողանի կողմից «անճոռնի ու ապամոնտաժման ենթակա» անվանված Կարսի հուշարձանի ապամոնտաժման աշխատանքները մեկնարկել են Հայոց ցեղասպանության 96-րդ տարելիցի օրը՝ ապրիլի 24-ին, և ավարտվել են հունիսի 14-ին։

http://daily.am/?l=am&p=4260