Եվրախորհրդարանը պատգամավորների ձայների մեծամասնությամբ այսօր վավերացրել է Թուրքիայի գծով զեկուցող, հոլանդացի քրիստոնեադեմոկրատ խորհրդարանական Ռիա Օոմեն Ռուիջթենի պատրաստած զեկույցը:
Ինչպես հաղորդում է «Արմենպրես»–ը` վկայակոչելով թուրքական «Սաբահ» թերթը, զեկույցում Եվրախորհրդարանը կոչ է արել Թուրքիային ճանաչել իր տարածքում բնակվող բոլոր էթնիկ խմբերին եւ պահանջել երաշխավորել մայրենի լեզուն ուսումնասիրելու նրանց իրավունքը:
Ռուիջթենը Եվրախորհրդարանում կազմակերպված մամուլի ասուլիսում ասել է, որ Թուրքիան պետք է ակտիվորեն շարունակի բանակի, դատաիրավական համակարգի հետ կապված բարեփոխումները, թույլ տա զինվորականներին դատել նաեւ քաղաքացիական դատարաններում: Զեկույցում անդրադարձ է կատարվել նաեւ խոսքի եւ մամուլի ազատության բնագավառում Թուրքիայի առկա իրավիճակին:
Եվրախորհրդարանի նախագահ Մարտին Շուլցը դատապարտել է Թուրքիայում լրագրողների հետապնդումները եւ նշել, որ այդ երկրում ժողովրդավարության բանագվառում հետընթաց է նկատվում: «100-ից ավելի լրագրողներ կան ձերբակալված Թուրքիայում: Նրանք բոլորը գրեթե քրդեր են կամ կապված են քրդական հակամարտության հետ», -ասել է Շուլցը` նշելով, որ Թուրքիան պետք է բարեփոխի նաեւ իր հակաահաբեկչական օրենքները, որոնցից օգտվելով, այսօր բազմաթիվ մարդկանց բանտերն է նետում ակտիվ հասարակական գործունեություն ծավալելու համար:
Leave a Reply