Իսրայելի Կնեսետի առանցքային դեմքերը հանդես են գալիս հօգուտ Հայոց ցեղասպանության ճանաչման: Այդ մասին, այսօր` մարտի 30-ին, մամուլի ասուլիսում հայտարարել է Երուսաղեմում Հայ դատի գրասենյակի ներկայացուցիչ Հակոբ Սեւանը:
Ներկայում, Սեւանի խոսքով, Երուսաղեմի Հայ դատի գրասենյակը ակտիվ բանակցություններ է վարում` Ցեղասպանության ճանաչման հարցի քննարկման շարունակականությունն ապահովելու համար: «Անխոս, հրեաների համար Հոլոքոսթը բացառիկ հանցագործություն է, սակայն Կնեսետում կան մարդիկ, որոնք հայտարարում են, թե կան մարդկության այլ ողբերգություններ եւս, որոնք չի կարելի արհամարհել, եւ Հայոց ցեղասպանությունը հենց այդպիսի ողբերգություն է:
Այսինքն, հայտնվել են մարդիկ, որոնք համարում են, թե Իսրայելը բարոյական իրավունք չունի արհամարհել Հայոց ցեղասպանությունը: Բնականաբար, Իսրայելում գերակշռող են քաղաքական տրամադրությունները, սակայն մենք կարողացանք դրանք ճիշտ օգտագործել եւ Հայոց ցեղասպանության հարցի քննարկումը մտցնել Կնեսետ»,-ասել է նա:
Մեկնաբանելով հարցի առաջմղման հնարավորությունը թուրք-իսրայելական հարաբերությունների սառեցման համատեքստում` Սեւանը նշել է, թե հակասությունների առաջին փուլում բոլորին թվում էր, թե դա ներկայացում է: «Մենք կարծում էինք, որ Թուրքիան նման քայլեր ձեռնարկում է միայն արաբական աշխարհում իր հեղինակությունը բարձրացնելու համար, սակայն արդյունքում պարզվեց, որ իսկապես լուրջ տարաձայնություններ կան: Եթե ոչ կառավարական մակարդակում, ապա իսրայելական հասարակությունում հակաթուրքական տրամադրություններն սկսեցին աճել»:
Խոսելով Ցեղասպանության ճանաչման ճանապարհին առկա հիմնական խոչընդոտների մասին` նկատել է, որ հայ-թուրքական արձանագրությունները մեծ հարված հասցրին Հայ դատին: «Իսրայելի ԱԳՆ-ն առ այսօր վկայակոչում է այդ փաստաթղթերը եւ հրաժարվում է զիջումների գնալ այդ հարցում: Նրանք նշում են, որ բանակցությունները սկսվել են, եւ հարցը պետք է թողնել Հայաստանին եւ Թուրքիային»:
Leave a Reply