Դատախազ Հիքմեթ Ուսթան Հրանտ Դինքի սպանության գործով բողոքարկել է դատարանի կայացրած որոշումը: 30 էջանոց բողոքարկման դիմումում դատախազը պնդել է, որ Էրհան Թունջելը և Յասին Հայալը Տրապիզոնում գործող ահաբեկչական խմբավորման ղեկավարներ են:
Օգյուն Սամասթը, ով հանցագործությունը գործելու պահին անչափահաս է եղել, այդ խմբավորման անդամներից է, իսկ Դինքին սպանելու ցուցումը ստացել է խմբավորման ղեկավարներից:
Նա նշել է, որ դատարանը բավարար ուշադրություն չի դարձրել Էրգենեկոն խմբավորման հետ կապ ունենալու հարցին և չի ներգրավել մարդկանց, ովքեր նույնպես պետք է պատասխանատվության ենթարկվեին:
Դատախազը շեշտել է, որ Դինքի սպանության գործում որպես կասկածյալներ պետք է ներգրավվեին նաև Էրսին Յոլջուն, Ահմեթ Իսքենդերը, Մուսթաֆա Օզթուրքը, Զոյնալ Աբիդին Յավուզը, Թույջան Ուզունդալը` որպես նույն խմբավորման անդամներ, ովքեր սպանության հարցում օգնել են խմբավորմանը:
Կասկածյալները համագործակցել են Էրգենեկոն ահաբեկչական խմբավորման հետ և Էրգենեկոնն ու Տրապիզոնի «բջջային կառույցի» ԴՆԹ-ները կարծես նույնն են:
Ուսթան ուշադրություն է հրավիրել նաև Տրապիզոնի ժանդարմերիայի վրա: Մինչ սպանությունը, ժանդարմերիան տեղեկություններ ունեցել է խմբավորման մասին, սակայն ոչ իրավական, ոչ էլ ֆիզիկական որևէ հետապնդում չի իրականացրել:
Leave a Reply