Թուրք լրագրողը Եվրախորհրդարանում բարձրաձայնել է երկրում խոսքի ազատության բացակայության մասին

Թուրք լրագրող Ահմեդ Շըքը Բրյուսելում ելույթ է ունեցել Եվրախորհրդարանի` Թուրքիայում լրագրողների դեմ բացված դատական գործերն ուսումնասիրող հանձնաժողովի առջև: Նա նշել է, որ Թուրքիայում մարդու իրավունքները, մասնավորապես խոսքի ազատության իրավունքը մշտապես խախտվում է: Այս մասից հաղորդում է «Արմենպրես»–ը` վկայակոչելով թուրքական «Հուրիեթ» թերթը:

Շըքի խոսքով` ներկայում Թուրքիայում մարդիկ վախենում են ինչ-որ բան ասել, առավել ևս ցույցեր կազմակերպել: Նա ներկաներին պատմել է իր և մի տաքսու վարորդի միջև տեղի ունեցած երկխոսությունը, որը եղել է բանտից դուրս գալուց մի քանի օր հետո: Երբ վարորդը հարցրել է իրեն, թե ով է ինքը մասնագիտությամբ, վերջինս պատասխանել է, որ լրագրող է: «Եղբայր, զգույշ եղիր, քեզ էլ չձերբակալեն»,-ասել է վարորդը: Շըքի այս պատմությունը ծիծաղեցրել է խորհրդարանականներին:

http://armenpress.am/arm/news/686015/turq-lragroxy-evrakhorhrdaranum-bardzradzaynel-e-erkrum.html