Թուրքիայում նոր հետաքննություն է սկսվում Սվազի կոտորածի շուրջ

Մալաթիայի հատուկ լիազորություններով հանրապետական դատախազությունը նոր հետաքննություն է սկսում 1993 թ. հուլիսի 2-ին Սվազի հյուրանոցներից մեկում ալեվիների հավատքի մասնակիցներին կենդանի-կենդանի այրելու քրեական գործի շուրջ:

Այս մասին, ինչպես հաղորդում է «Արմենպրես»–ը, հայտնում է թուրքական «Սաբահ» թերթը: Նոր հետաքննության ընթացքում կուսումնասիրվեն իրադարձության հետեւում կազմակերպված խմբավորում լինելու եւ միջադեպին միջամտած մարդկանց վերաբերյալ եղած փաստաթղթերը:

Նշենք, որ երկու շաբաթ առաջ Մալաթիայի դատարաններից մեկը հիշյալ գործով հրապարակած վճռում նշել էր, որ գործը ժամկետանց լինելու պատճառով կասեցվում է եւ դատարանի դահլիճից ազատ արձակել հյուրանոցը հրդեհելու մեջ կասկածվող անձանց, ինչը բողոքի մեծ ալիք էր բարձրացրել Թուրքիայում:

Սվազում ալեվիների հավաքի պատճառով հյուրանոցի հրդեհման հետեւանքով պաշտոնական տվյալներով 37 մարդ (ոչ պաշտոնական տվյալներով` 100-ից ավելի) զոհվել, 100-ից ավելի մարդ էլ վիրավորվել էր: Ալեվիների այդ հավաքին մասնակցում էր նաեւ թուրք գրող Ազիզ Նեսինը: Ենթադրվում է, որ հյուրանոցը հրդեհվել է կրոնական խտրականության եւ անհանդուրժողականության պատճառով:

http://armenpress.am/arm/news/685962/turqiayum-nor-hetaqnnutyun-e-sksvum-svazi-kotoratsi.html