Թուրք պատգամավորը կրոնական խտրականության հարցապնդում է արել

Թուրքիայի գլխավոր ընդդիմադիր Ժողովրդահանրապետական կուսակցության (ԺՀԿ) պատգամավոր Այքան Էյդեմիրը խորհրդարանում հանդես է եկել կրոնական խտրականության մասին հարցապնդումով, նշելով, թե որքանո՞վ է նպատակահարմար Թուրքիայի քաղաքացիների անձնագրերում կրոնական պատկանելության մասին կատարվող նշումը:

Ինչպես հաղորդում է «Արմենպրես»–ը` վկայակոչելով քրդական Firat լրատվական գործակալությունը, հարցապնդման ժամանակ Էյդեմիրը հիշատակել է Թուրքիայի Բաթման քաղաքի հայազգի բնակիչ, լրագրող Ջեւաթ Սինեթի հետ տեղի ունեցած միջադեպը, երբ նրա անձնագրում կրոնական պատկանելության մասին նշումը խտրականության պատճառ է դարձել պետական հաստատություններում:

Հիշեցնենք, որ Թուրքիայի սոցիալական ծառայությունը մերժել է հաստատել Սինեթի հաշմանդամության փաստաթղթերը եւ լուծել նրա նպաստի հարցը: Ավելին, սոցծառայության աշխատակիցը նվաստացրել է նրան եւ հայտարարել, որ չի ցանկանում «ժամանակ վատնել ոչ մահմեդականի վրա»: Սինեթը դիմել է թուրքական դատական ատյաններ, սակայն, այնտեղ եւս պաշտպանություն չի գտել: Այնուհետեւ, Սինեթը Թուրքիայում բնակվող ոչ մահմեդակաների հանդեպ ցուցաբերվող կրոնական խտրականության, ռասիստական վերաբերմունքի եւ հաշմանդամ քաղաքացուն վիրավորելու մեղադրական հայցով դիմել է Մարդու իրավունքների եվրոպական դատարան (ՄԻԵԴ):

Թուրք պատգամավորը հարցապնդումով փորձել է իշխանություններից պարզել, թե ինչ է արվում երկրում առկա կրոնական խտրականությունը վերացնելու ուղղությամբ: Նա գրավոր հարցում է արել Թուրքիայի ներքին գործերի նախարար Իդրիս Նաիմ Շահինին: 

http://armenpress.am/arm/news/685919/turq-patgamavory-kronakan-khtrakanutyan-harcapndum.html