«Հայկական հաց» ֆիլմը կներկայացվի Թեքսաս նահանգի Աուստին քաղաքում կայանալիք Քրիստոնեական կինոփառատոնում

Հայաստանի մշակույթի նախարարության աջակցությամբ ռեժիսոր եւ պրոդյուսեր Արմեն Գասպարյանը «Հայկական հաց» վավերագրական լիամետրաժ ֆիլմը (Հայաստան, ՌԴ, Իտալիա համատեղ արտադրություն, 2010 թ.) 2012 թ. մարտի 31-ին կներկայացնի ԱՄՆ-ի Տեխաս նահանգի Աուստին քաղաքում կայանալիք Քրիստոնեական կինոփառատոնին:

Մշակույթի նախարարության մամուլի ծառայությունից NEWS.am-ին հայտնում են, որ Ա. Գասպարյանի «Հայկական հաց» ֆիլմը 2011 թ. մասնակցելով միջազգային 2 կինոփառատոների՝ արժանացել է 3 մրցանակի:

2011 թ. սեպտեմբերի 6-10-ը ֆիլմը մասնակցել է Բելառուսի Հանրապետությունում կայացած Քրիստոնեական վավերագրական եւ հեռուստատեսային ծրագրերի «Մագնիֆիկատ» 7-րդ միջազգային կինոփառատոնին եւ արժանացել է՝ «Ազգային պատմության ցավոտ խնդիրների բացահայտման պրոֆեսիոնալիզմի համար» ժյուրիի մրցանակին, «Եղեռնի ժամանակ հայ քրիստոնյաների արիասիրտ հավատքի մասին խորը կինովկայության համար» Բելառուսահունական կաթոլիկ եկեղեցու առաքելական առաջնորդարանի հատուկ մրցանակին:

Նախարարության աջակցությամբ Ա. Գասպարյանը մասնակցել է նաեւ Մոսկվայում նոյեմբերի 1-8-ը կայացած «Лучезарный Ангел» միջազգային 8-րդ բարեգործական կինոփառատոնին, որի արդյունքում ֆիլմն ընտրվել է կինոյի եւ հեռուստածրագրերի «Ռադոնեժ» միջազգային փառատոնի մրցութային ծրագրում (դեկտեմբերի 4-8-ը) եւ արժանացել «Լավագույն օպերատորական աշխատանք» (օպերատոր՝ Գագիկ Հարությունյան) մրցանակին:

http://news.am/arm/news/98528.html