Էրդողանը հայերի եւս մեկ թուրք դահճի է բացահայտել

Թուրքիայի վարչապետ Ռեջեբ Թայիբ Էրդողանը մարտի 23-ին Անկարայի ռազմական ակադեմիաների հրամատարությունում մամուլից գաղտնի հանդիպում է ունեցել ակադեմիայի սպայական եւ ունկնդիր աձնակազմի հետ:

Ինչպես հաղորդում է «Արմենպրես»–ը, «Հաբերթուրք»-ի թղթակից Բյուլենթ Այդեմիրին հայտնի է դարձել, որ Էրդողանը ակադեմիայում ունեցած մեկ ժամ տեւած ելույթում խոսել է «թուրքական սրի հաջողությունների» մասին եւ բացահայտել 1915 թ. հայ խաղաղ բնակչությանը սրի մատնած եւս մեկ դահճի անուն:

Խոսելով Աֆղանստանում օրերս կործանված թուրքական ռազմական ուղղաթիռում 12 թուրք սպաների մահվան մասին` Էրդողանը կարեւորել է այլ երկրներում թուրքական զինված ուժերի ներկայացվածությունը: Նշելով, որ Թուրքիան 35 տարբեր երկրներում «նահատակներ» ունի, Էրդողանը հայտարարել է, որ այդ «նահատակների» շնորհիվ է, որ «Թուրքիան այսօր հասել է տիեզերք արբանյակ ուղարկելու մակարդակի»:

«Մենք պետք է դաստիարակենք «Տափաստանի առյուծ» մականունով Ֆահրեդդին փաշայի նման զինվորականներ, ով Մուդրոսի զինադադարից հետո 72 օր շարունակ պաշտպանեց Մեդինեն: 1881 թ. նա արդեն հարյուրապետ էր օսմանյան բանակում: Կռվել է Բալկանյան պատերազմում` Էդիրնեն հետ վերադարձնելու համար: 1915 թ. հետ է կանչվել Մոսուլից եւ նշանակվել 4-րդ բանակի հրամանատարի տեղակալ: Նա է ուղեկցել տեղահանավող հայերին եւ մարտնչել Ուրֆայի, Զեյթունի, Մուսա լեռան եւ Հաճնի հայ ապստամբների հետ», -ասել է Էրդողանը եւ կոչ է արել ակադեմիայի ունկնդիրներին` օրինակ վերցնել նման հրամանատարներից:

http://armenpress.am/arm/news/685367/erdoxany-hayeri-evs-mek-turq-dahtchi-e-bacahaytel.html