Դիարբեքիրում բացված երաժշտական ուսումնարանն անվանակոչվել է հայ երաժշտի անունով

Դիարբեքիրում արեւմտահայ անվանի երգիչ եւ երգահան Տիգրան Արամի անվան երաժշտական ուսումնարան է բացվել:

Ինչպես հաղորդում է «Արմենպրես»–ը` վկայակոչելով քրդական ԶԼՄ-ներ, ուսումնարանը քրդական մշակույթի եւ արվեստի բնագավառում այլընտրանքային կրթություն է առաջարկում կինոյի, երաժշտության, թատրոնի, ֆոլկլորի եւ գեղանկարչության ոլորտներում:

«Ուսանողները, որոնք այստեղ կրթություն են ստանում, այլ մենթալիտետ ունեն թուրքական կրթական համակարգի եւ պաշտոնական սահմանափակումների համեմատությամբ», -նշել է Դիարբեքիրի քաղաքապետարանի մշակույթի եւ զբոսաշրջության բաժնի ղեկավարը:

Տիգրան Արամը Արեւմտյան Հայաստանում եւ քուրդ բնակչության շրջանում մեծ համբավ ունեցող երաժիշտ է եղել: Նա հավաքագրել եւ վերամշակել է բազմաթիվ քրդական ժողովրդական երգեր: Քրդերը Տիգրան Արամին համարում են քրդական ժողովրդական երաժշտության հիմնադիր: Տիգրան Արամը ծնվել է Սիրիայի Կամըշլը քաղաքում` Դիարբեքիրից արտագաղթած հայկական ընտանիքում: Տիգրան Արամը իր մահկանացուն կնքել է երկու տարի առաջ Եգիպտոսում: Չնայած մեծ երգահանը կտակել էր թաղել իրեն Դիարբեքիրում, Թուրքիայի իշխանություններն արգելել են դա: Դիարբեքիրի քաղաքապետ Օսման Բայդեմիրը մասնակցել է Տիգրան Արամի հուղարկավորությանը Կահիրեում, այնտեղից հող բերել Դիրաբեքիր եւ ամփոփել մեծ երաժշտի համար Դիարբեքիրում նախատեսված գերեզմանում:

http://armenpress.am/arm/news/685029/diarbeqirum-bacvats-erazhshtakan-usumnarann-anvanakochvel.html