Թուրքիան հայտնվել է կրոնական ազատությունները կոպտորեն ոտնահարող երկրների շարքում

ԱՄՆ կրոնական ազատությունների միջազգային հանձնաժողովը (USCIRF) 2011 թ-ի համար պատրաստած զեկույցում Թուրքիան նշել է կրոնական ազատությունները կոպտորեն ոտնահարող երկրների շարքում:

Ինչպես հաղորդում է «Արմենպրես»–ը` վկայակոչելով թուրքական «Հուրիեթ» թերթը, հանձնաժողովի պատվիրակությունը զեկույցը պատրաստել է 2011 թ-ի փետրվարի 21-26-ին Թուրքիայում կատարած հետազոտությունների հիման վրա եւ նշել, որ Թուրքիայում կրոնական ազատությունների «համակարգված եւ արտառոց վատ սահմանափակումներ» են արվում: Ամերիկյան հանձաժողովի պատվիրակության անդամները Թուրքիայում հանդիպել են Եվրամիության հարցերով նախարար Էգեմեն Բաղըշի, շիա, սունի, բողոքական, հունական, հայկական, ասորական, ալեվի, հրեական եւ մորմոնների կրոնական ուղղությունների առաջնորդների, ինչպես նաեւ մեդիա եւ գիտական շրջանակների ներկայացուցիչների հետ: Զեկույցը քննադատել է Թուրքիային` փոքրամասնությունների կենսունակության նկատմամբ սպառնալիքներն այդ երկրում շարունակվելու համար:

Կրոնական ազատությունները կոպտորեն ոտնահարող երկրների շարքում Թուրքիայի հետ USCIRF-ն ընդգրկել է Տաջիկստանը, Մյանմարը, Հյուսիսային Կորեան, Եգիպտոսը, Էրիթրեյան, Իրանը, Իրաքը, Նիգերիան, Պակիստանը, Չինաստանը, Սաուդյան Արաբիան, Սուդանը, Թուրքմենստանը, Ուզբեկստանը եւ Վիետնամը:

http://armenpress.am/arm/news/684659/turqian-haytnvel-e-kronakan-azatutyunnery-koptoren.html