Քրդերի Նաուրուզի տոնակատարությունը Թուրքիայում ուղեկցվում է ոստիկանության հետ բախումներով

Թուրքիայի քրդաբնակ Մերսին, Բաթման, Շըռնաք, Վան, Ուրֆա, Յուքսեքովա եւ Հաքքարի նահանգներում Նոուրուզի տոնակատարությունը ուղեկցվում է թուրքական ոստիկանության հետ քրդերի բախումներով: Թուրք ոստիկանը Բաթմանում ավտոբուսից իջնելու պահին բռունցքով հարվածել է Թուրքիայի խորհրդարանի պատգամավոր, Քրդստանի հանրությունների կոնգրեսի առաջնորդ Ահմեդ Թուրքի դեմքին, ինչի արդյունքում նա հայտնվել է հիվանդանոցում: Ահմեդ Թուրքի առողջական վիճակը ծանրացել է նաեւ այն պատճառով, որ նա թունավորվել է քուրդ միտինգավորների դեմ ոստիկանության օգտագործած արցունքաբեր գազով: Այս մասին, ինչպես հաղորդում է «Արմենպրես»–ը, հայտնում են թուրքական ԶԼՄ-երը:

Ահմեդ Թուրքը ավելի վաղ Սամսունում 27-ամյա մի ազգայնականի կողմից նման հարձակման է ենթարկվել նաեւ 2010 թ-ի ապրիլի 12-ին Մուշի Բուլանըք ավանում 2 մարդկանց սպանության գործով դատական գործընթացին հետեւելու համար այդտեղ ժամանելու պահին: Այն ժամանակ հանցագործը կոտրել է նրա քիթը, սակայն, դրա համար թուրքական դատարանը նրան չի դատապարտել:

Հիմնավորելով այն բանով, որ Թուրքիայի ներքին գործերի նախարարությունը հրահանգել է մարտի 21-ից բացի այլ օր Նաուրուզը չնշել, ոստիկանությունը արցունքաբեր գազ եւ ջրցան մեքենաներ է օգտագործել Նաուրուզը երեկվանից տոնել սկսած քրդերի դեմ:

Նշենք, որ Նաուրուզը համարվում է իսլամի շիա ուղղության հետեւորդների տոնը: Սունի թուրքերը չեն նշում տոնը: Տոնը նշվում է մարտի 21-ի` գարնանային գիշերահավասարման օրը` կապված արեգակնային օրացույցի հետ: Այն Կենտրոնական Ասիայի եւ Իրանի ժողովուրդների մոտ սկսել է նշվել յոթ հազարամյակ առաջ եւ մահմեդական ամանորի հետ ոչ մի կապ չունի: Իրանում Նաուրուզի տոնակատարությունները սովորաբար տեւում են 13 օր:

http://armenpress.am/arm/news/684662/qrderi-nauruzi-tonakatarutyuny-turqiayum-uxekcvum.html