Դիարբեքիրի բնակչության կեսը «ինքնավարություն» է պահանջել

Թուրքիայում գործող Սոցիալական և քաղաքական ուսումնասիրությունների կենտրոնը (SAMER- Sosyal Siyasal Araştırmalar Merkezi) Դիարբեքիրում հարցում է անցկացրել` «Հանրաքվե լինելու դեպքում ի՞նչ կպահանջեն քրդերը» թեմայով: «Միլիեթ» օրաթերթի փոխանցմամբ` հարցման մասնակիցների 40 տոկոսը կազմել են կանայք, 60-ը` տղամարդիկ, 30 տոկոսը եղել են լիցեյի շրջանավարտներ, 24 տոկոսն ունեցել է տարրական կրթություն, իսկ 15-ը` միջնակարգ: Հարցման մասնակիցների 22.3 տոկոսը գտնվել է 20-24 տարիքային սահմաններում:

Հարցման մասնակիցների 87 տոկոսը դրական պատասխանել է տվել «Քրդերի պահանջների ուղղությամբ պե՞տք է հանրաքվե անցկացնել» հարցին, իսկ 2 տոկոսը դժվարացել է պատասխանել:

«Հանրաքվե անցկացվելու դեպքում ի՞նչ կպահանջեք» հարցին 49.2 տոկոսը պատասխանել է «ինքնավարություն», 19.2 տոկոսը` անկախություն, 5.4 տոկոսը` դաշնություն, իսկ 7.1 տոկոսը պահանջել է ապակենտրոնացված կառավարում` քաղաքապետարաններին շնորհված լայն իրավասություններով:

Մասնակիցների 83 տոկոսը դրական է պատասխանել «Քրդերենը պե՞տք է պաշտոնական լեզու լինի Թուրքիայում» հարցին, իսկ 8 տոկոսը դժվարացել է պատասխանել:

«Փոխվարչապետ Բյուլենթ Արընչի` «Քրդերենը քաղաքակրթության լեզու չէ» հայտարարության մասին լսե՞լ եք» հարցին մասնակիցների 45 տոկոսը պատասխանել է` այո, 1 տոկոսը պատասխան չի տվել: «Ի՞նչ եք մտածում Արընչի հիշյալ հայտարարության մասին» հարցին մասնակիցների 43 տոկոսը պատասխանել է. «Սխալ և ոչ տեղին հայտարարություն է», իսկ 18 տոկոսը` «Դատապարտում ենք»:

«KCK-ի (Քուրդիստանի համայնքների միություն) գործողությունները ի՞նչ ազդեցություն են թողնում քրդական խնդրի վրա» հարցին մասնակիցների 43.4 տոկոսը պատասխանել է` «բացասական», 24.2 տոկոսը` «խիստ բացասական», 6.4 տոկոսը` «որևէ ազդեցություն չի թողնում», 2.7 տոկոսը` «դրական է ազդում»:

«Ինչպե՞ս եք գնահատում Խաղաղություն և ժողովրդավարություն կուսակցության անդամ պատգամավորների և քաղաքապետերի հացադուլ հայտարարելը» հարցին 66 տոկոսը պատասխանել է` «իրավացի», 9 տոկոսը` «ոչ անհրաժեշտ», 9 տոկոսը` «անօգուտ»:
«Քրդերի ապագայի տեսանկյունից կարևո՞ր է արդյոք Քրդական ազգային համագումարի հրավիրումը» հարցին մասնակիցների 79 տոկոսը պատասխանել է` «շատ կարևոր է»:

20.03.2012

Akunq.net