Հայ կամավորներն օսմանյան բանակում մասնակցել են Դարդանելի պատերազմին. թուրք պատմաբան

Թուրք գրող-պատմաբան Ոլքան Շենելը, խոսելով լրագրողների հետ, հայտարարել է, որ 1915-1916 թվականի Դարդանելի պատերազմին (Անտանտի և Օսմանյան կայսրության միջև) մասնակցել են նաև հայ կամավորներ:

Ինչպես տեղեկացնում է ստամբուլյան «ՀայԹերթը», Շենելը նշել է, թե «ինքն ուսումնասիրել է օսմանյան հպատակ հանդիսացող երեք հայերի կենսագրությունները, ովքեր կամավոր սկզբունքներով մասնակցել են Անտանտի դեմ պատերազմին օսմանյան զորքերի կազմում»:

Երեք հայերն էլ, ըստ թուրք պատմաբանի, զոհվել են նույն պատերազմի ժամանակ:

Թուրք հեղինակն ուշադրություն է հրավիրել այն բանի վրա, որ «թեև Օսմանյան կայսրությունում ոչ մուսուլմաններին զինվորական ծառայութան չեն վերցրել, սակայն եղել են քրիստոնյաներ, ովքեր կամավոր հիմունքներով են ծառայել օսմանյան բանակում»:

Հարկ է հիշեցնել, որ Հայոց ցեղասպանությունից առաջ Օսմանյան կայսրությունում բնակվող հայ տղամարդկանց մի ստվար հատված զորակոչվել է բանակ: Հայերը, սակայն, օսմանյան բանակում կատարել են տաժանակիր աշխատանք, նրանցից շատերը սպանվել են, մահացել հիվանդություններից: Երիտթուրք պարագլուխներն այս կերպ ճանապարհ են բացել հայերի զանգվածային կոտորածների համար` նրանց զրկելով պաշտպանության հնարավորությունից:

HayNews.am