Ստամբուլում հրատարակվող «Ակօս» շաբաթաթերթի խմբագրապետ Հրանտ Դինքի սպանությունն իրականացրած Օգյուն Սամասթի ձերբակալումից անմիջապես հետո թուրքական դրոշի մոտ լուսանկարված ոստիկանի պաշտոնը բարձրացվել է:Սպանությունից մի քանի ժամ հետո Սամասթին Սամսունում ձերբակալել էին և տեղափոխել ոստիկանական բաժանմունք, որտեղ նրան որպես հերոս են ընդունել: Որոշ ոստիկաններ նաև լուսանկարվել էին Սամասթի հետ, ով իր ձեռքերում պահել էր Թուրքիայի դրոշը:
Եվ ահա Թուրքիայի Պետական վերահսկիչ պալատի` Դինքի սպանության և դատավարության վերաբերյալ ուսումնասիրության արդյունքում, որը հրատարակվել էր օրերս, պարզ է դարձել, որ մարդասպանին հերոսացրած ոստիկաններից մեկը պաշտոնի զգալի բարձրացում է ստացել:
Լուսանկարի ձախ կողմից առաջինը Յաքուփ Քուրթուրանն է, ով էլ այժմ զբաղեցնում է Մալաթիա նահանգի փոխոստիկանապետի պաշտոնը: Մինչ այդ պաշտոնին հասնելը Քուրթուրանը հաջողացրել է նաև մի քանի այլ կարևոր պաշտոններ զբաղեցնել Թուրքիայի ոստիկանությունում:
Հետաքրքիր է, որ այս լուսանկարի հրապարակումից հետո Քուրթուրանին ենթարկել էին աննշան մի տույժի, այն է` զրկվել էր մեկ օրվա աշխատավարձից:
HayNews.am
Leave a Reply