Դինքի սպանությունն իրականացնողը կարեւոր հայտարարություն է արել

Հրանտ Դինքի սպանության պատվերը կատարած Օգյուն Սամասթը բանտում պատասխանել է թուրքական Taraf-ի թղթակցի հարցերին։

Օգյուն Սամասթը հայտնել է, թե Հրանտ Դինքի սպանության կատարման մեջ, բացի իրենցից եւ Յասին Հայալից, կա նաեւ 3-րդ անձ, ում հետ ինքը հանդիպել էր սպանությունից 3 ամիս առաջ։ Սամասթը պնդել է, թե ինքը այդ անձին կբացահայտնի, եթե իր դեմ դատարանի որոշումը վճռաբեկ դատարանը չեղյալ հայտարարի։

Սամասթի խոսքով՝ Դինքի սպանության մեջ իր չափ մեղավորություն ունեն այն անձիք կամ լրատվամիջոցները, ովքեր Դինքին «հայրենիքի դավաճան» էին հայտարարում եւ ազգայնականների համար թիրած դարձնում։ «Դատարանը պետք է նրանց դեմ հետաքննություն սկսի։ Ես ոչ Հրանտ Դինքին եմ ճանաչել, ոչ էլ՝ «Ակօս»-ը։ Ես սխալ եմ թույլ տվել, որի համար վճարում եմ իմ երիտասարդության տարիներով։

Երբ ես Դինքին տեսա, խուսափեցի նրան սպանել, սակայն իմ մտքում եկան նրա դեմ գրված խոսքերը, եւ գնացի այդ քայլին։ Դինքին սպանելը իմ սրտով չի եղել, պարզապես ես բազմաթիվ սպառնալիքներ եմ ստացել։ Ես սպանությունից հետո հանձնվելու էի։ Յասին Հայալն ինձ վստահեցնում էր, որ ես 6-7 ամիս հետո դուրս էի գալու բանտից։ Յասին Հայալն է ինձ տվել Դինքի լուսանկարներն ու զենքը, որով իրականացրել եմ սպանությունը։ Շատ լավ եղավ, որ ինձ ձերբակալեցին, քանի որ եթե չձերբակալվեի, ինձ սպանելու էին։ Ես այդ մասին կարդացել եմ Նեդիմ Շեների «Կարմիր ուրբաթ» գրքում»,-ասել է Օգյուն Սամասթը։

Նշենք, որ Օգյուն Սամասթի փաստաբանի դիմումի համաձայն՝ նրա գործը տեղափոխվել էր Ստամբուլի անչափահասների համար նախատեսված դատարան, քանի որ փաստաբանը հիմնավորել էր, թե սպանության պահին Սամասթը անչափահաս է եղել։

Անչափահասների գործերով դատարանը Դինքի սպանությունն իրականացրած Օգյուն Սամասթին դատապարտել է 21 տարի 6 ամիս ազատազրկման՝ կանխամտածված սպանության համար եւ 1 տարի 4 ամիս՝ անօրինական զենք կրելու համար։ Ըստ այդմ, Սամասթի պատժաչափը հասել է 22 տարի 10 ամսվա:

Հիշեցնենք, որ հունվարի 17-ին թուրքական դատարանը Դինքի սպանության գործում Յասին Հայալին մեղավոր ճանաչեց սպանությունը ծրագրավորելու եւ կազմակերպելու մեղադրանքով եւ դատապարտեց ցմահ ազատազրկման։ Սպանության ուղղորդողներից Էրհան Թունջելը Դինքի սպանության գործով անմեղ ճանաչվեց եւ դատապարտվեց 10 տարի 6 ամիս պատժաչափի՝ Mc Donald’s-ի պայթյունի համար։ Սակայն դատարանը նրան ազատ արձակման որոշում է կայացրել` հաշվի առնելով, որ նա այսքան ժամանակ գտնվել է կալանքի տակ: Համապատասխան գործընթացից հետո Էրհան Թունջելը ազատ է արձակվել:

http://news.am/arm/news/97535.html