Դինքի կինը թուրք պաշտոնյաների աշխատանքը նմանեցրել է «երեք կապիկների» ծառայությանը

ԵՐԵՎԱՆ, 16 ՄԱՐՏԻ, ԱՐՄԵՆՊՐԵՍ: «Ակօս» թերթի նախկին խմբագիր Հրանտ Դինքի կինը` Ռաքել Դինքը,  իր իրավաբանների հետ մամուլի ասուլիս է հրավիրել, որի ընթացքում անդրադարձել է Դինքի սպանությանն ու դրանից առաջ իր ամուսնուն արվող սպառնալիքներին: Ինչպես հաղորդում է «Արմենպրես»-ը` այս մասին տեղեկացնում է CNN Turk-ը:

Ռաքելը, նշելով Հրանտին հնչած տարբեր սպառնալիքները, «Ակօս»-ի խմբագրատան առջև կազմակերպվող ցույցերը, հարց է տվել, թե որտեղ են այն ժամանակ եղել Թուրքիայի վարչապետը, Ներքին գործերի նախարարը, Արդարադատության նախարարը, հետախուզական և անվտանգության մարմինները: «Նրանք, այս պաշտոնն իրականացնելով, իրավունք չունեին աչքաթող անել, փորձել անտեսել, կույր ձևանալ, խուլ լինել»,- նշել է Ռաքել Դինքը: Վերջինս թուրք պաշտոնյաների աշխատանքը նմանեցրել է «երեք կապիկների» ծառայությանը, որոնք չեն ցանկանում «ոչ լսել, ոչ խոսել, ոչ տեսնել»` դրանով իսկ աջակից լինելով հանցագործությանը: «Եթե 100 հոգու էլ դատապարտեք, ինձ դրանից ի՞նչ կլինի: Հրանտ Դինքի դատավարությունը իմ, ձեր դատավարությունից առավել միևնույն ժամանակ առերեսվելու դատավարություն է: Հրանտ Դինքի դատավարությունն այն դատավարությունն է, որը պետք է ցույց տա արդարության նկատմամբ Թուրքիայի ունեցած դիրքորոշումը»,- ասել է Ռաքել Դինքը:

armenpress.am