Ինչպես հաղորդում է «Ջիհան» լրատվական գործակալությունը, Թուրքիայի Մշակույթի և զբոսաշրջության նախարարությունը դոտացիա է հատկացրել` վերանորոգելու Մալաթիայում լրագրող Հրանտ Դինքի ծնված թաղամասի և Վենք գյուղի եկեղեցին:
Մալաթիայի նահանգապետարանը գործի է անցել Չավուշօղլու թաղամասի Թաշհորոն հայկական եկեղեցու և Վենք (Վանք-Ակունքի խմբ.) գյուղի Վենք (Վանք) եկեղեցու վերանորոգման համար:
Հրանտ Դինքի ծնված թաղամասում գտնվող 250 ամյա Թաշհորոն և Վանք եկեղեցու համար պատրաստված նախագիծն ավարտելուց հետո ներկայացրել են Սվասի մշակույթի և բնական պաշարների պահպանության շրջանային խորհրդի հավանությանը: Երբ նախագիծն արժանացել է հավանության, Մշակույթի և զբոսաշրջության նախարարությունը, վերանորոգման նախագծերը մտցնելով 2012/2013 թթ. ներդրումների ծրագրերի մեջ, դոտացիա է հատկացրել:
Մալաթիայի նահանգապետ Ուլվի Սարան հայտնելով, որ քաղաքը բազմաթիվ քաղաքակրթությունների կենտրոն է և հազարավոր տարիների մշակութային ժառանգություն ունի, ասաց. «Մենք` որպես կառավարիչներ, առանձնահատուկ կարևորություն ենք տալիս մեր նահանգի պատմական և մշակութային կոթողների պահպանությանը: Մեր նահանգի պատմական վայրերի մի մասը ըստ արժանվույն վերանորոգել ենք, իսկ մի մասի վերանորոգման աշխատանքները ընթացքի մեջ են: Մեր նահանգի Չավուշօղլու թաղամասում գտնվող Թաշհորոն եկեղեցին և կենտրոնի կազմում գտնվող Վանք գյուղի Վանք եկեղեցին կանգուն են: Մեկ տարվա աշխատանքների արդյունքում Պատմական կոթողների պահպանության, գործադրման և փորձարկման վարչությունը կազմել է չափագրման, վերականգնման և վերանորոգման աշխատանքների նախագծերը: Սվասի մշակությաին ժառանգության պահպանման խորհրդի հավանությամբ վերոհիշյալ վերանորոգման նախագծերի համար դոտացիա է հատկացվել Մշակույթի և զբոսաշրջության նախարարության հետ մեր միասնական նախաձեռնության արդյունքում»:
Նահանգապետ Սարան նաև նշել է, որ նախապատրաստությունները սկսվել են, և որ նախագծերը համապատասխան մարմիններին կփոխանցեն տեխնիկական աշխատանքներն ավարտին հասցնելուց հետո:
17.03.2012
Akunq.net
Leave a Reply