Ասորիները մրցանակ կշնորհեն Զարաքօլուին

Ստոկհոլմում հիմնված Ասորական մշակույթի կենտրոնը որոշել է «Ասորական մշակույթի» այս տարվա մրցանակը շնորհել 2011 թ. նոյեմբերի 1-ից ազատազրկման մեջ գտնվող հրատարակիչ Ռագըփ Զարաքօլուին: Ինչպես Ստոկհոլմից հաղորդում է «Ֆըրաթ» գործակալության թղթակիցը, վերոհիշյալ կենտրոնը անցյալ տարի էլ ասորական լեզվի և մշակույթի զարգացման մեջ ունեցած նպաստի համար մրցանակ էր շնորհել Դիարբեքիրի Սուրի քաղաքապետ Աբդուլլահ Դեմիրբաշին:

Ասորական մշակույթի կենտրոնի նախագահ Ժորժ Բարյավնոյի խոսքերով` Զարաքօլուն ճանաչված է որպես Թուրքիայում և Եվրոպայում փոքրամասնությունների և մարդու իրավունքների պաշտպանության համար պայքար մղող մտավորական: Ժորժ Բարյավնոն ելույթում նաև ընդգծել է, թե Ռագըփ Զարաքօլուն մասնակցել է Թուրքիայում մարդու իրավունքների խախտումների և 1915 թ. հայերի և ասորիների դեմ իրականացված ցեղասպանության թեմայով բազմաթիվ քննարկումների և, չնայած բազմաթիվ ճնշումներին ու սպառնալիքներին, երբեք չի հրաժարվել իր ուղեգծից և պայքարից, որի գինը ներկայում վճարում է բանտում:

Նախատեսվում է, որ 5 հազար կրոն արժողությամբ մրցանակը Զարաքօլուին կշնորհվի եկող ամիս` շվեդացի պատգամավորների կողմից, ովքեր կայցելեն նրա բանտախուցը:

17.03.2012

Akunq.net