Նախկին եկեղեցին դառնալու է թանգարան

Կարելի է ասել, որ Թուրքիայում քրիստոնյաներին պատկանող եկեղեցիներն ու վանքերը վերանորոգելուց հետո թանգարան դարձնելու մոդելն արդեն դարձել է դասական: «haberler.com» կայքի փոխանցմամբ` այս անգամ էլ նման մոդելով վերանորոգվելու է Բալըքեսիրի Այվալըք գավառի կազմի մեջ մտնող Ալիբեյ (Ջունտա) կղզում գտնվող Սուրբ Նիկոլաս (Թաքսիյարհիս) եկեղեցին:  

Ռահմի Քոչ թանգարանագիտության և մշակութային հիմնադրամը եկեղեցին հիմնահատակ փլուզումից «փրկելու» և թանգարան դարձնելու պատակով 49 տարով վարձակալել է Այվալըքի ամենահին կոթողներից մեկը հանդիսացող Սուրբ Նիկոլա եկեղեցին, որը տարիներ շարունակ ավերի և ավարի են ենթարկել գանձագողերը:

Եկեղեցու վերանորոգման համար ծախսվելու է 9 միլիոն լիրա: Այնտեղ կազմակերպվելու են մշակութային միջոցառումներ: Այվալըքի ամենաշքեղ կառույցներից մեկը հանդիսացող եկեղեցու վերանորոգման աշխատանքներն արդեն սկսվել են: Իրավասուներն արդեն նշել են, որ 3 տարի հետո պատմական կառույցը վերաբացվելու է որպես մշակույթի և արվեստի թանգարան:

Այվալըքի կայմակամ Նիհաթ Նալբանդը նշելով, որ պատմական կոթողի վերանորոգումը, Այվալըքի համար մեծ նշանակություն ունի, ասաց. «Վերանորոգման աշխատանքներն ավարտին հասցնելուց հետո կառույցը ծառայելու է մշակութային միջոցառումներ անցկացնելուն: Գավառում մշակութային զբոսաշրջության զարգացման համար խթան է: Այս շինությունները փրկելն էլ ավելի է մեծացնում Այվալըքի հարստությունը` վերակենդանացնելով մշակութային զբոսաշրջությունը»:

Սուրբ Նիկոլաս եկեղեցին Ալիբեյ կղզու կարևոր եկեղեցիներից մեկն է: Եկեղեցու տանիքին տեղ գտած կնիքից պարզ է դառնում, որ եկեղեցին կառուցվել է 1873 թ.: Ժամանակի ամենահայտնի, մարմարե քանդակներով, առաստաղի զարդանախշերով, սրբապատկերներով, ձկան մաշկի վրա նկարված սրբապատկերներով զարդարված Սուրբ Նիկոլաս եկեղեցին վայր է, որտեղ գանձագողերը հաճախ էին այցելում:

15.03.2012

Akunq.net