Ֆրանսիայի և Թուրքիայի միջև դարի գործարքներից մեկն արդեն իրողություն է

Պարզվում է, որ Ֆրանսիայի Սենատում 1915-ի Հայոց ցեղասպանության ժխտումը քրեականացնող օրենքն ունի նաև տնտեսության խթանիչ ուժ:

Թուրքիայի կողմից Ֆրանսիայի նկատմամբ կիրառվող «պատժամիջոցները» դրական են ազդել երկու երկրների միջև խոշոր գործարքներ կնքելու առումով:

Ֆրանսիական օդանավակայաններ սպասարկող ADP ընկերությունը 874 մլն դոլարով գնել է թուրքական օդանավակայաններ սպասարկող TAV ընկերության բաժնեմասերի 38 տոկոսը: Հիշեցնենք, որ ADP-ն սպասարկում և կառավարում է Փարիզի Շառլ Դը Գոլ օդանավակայանը:

Այն բանից հետո, երբ վարչապետ Էրդողանը 2011-ին հայտարարեց Ստամբուլում նոր օդանավակայանի կառուցման մասին, թուրքական օդանավակայաններ կառավարող և սպասարկող TAV ընկերության դիրքերը միջազգային բորսաներում բավականին բարելավվեցին:

Այս ընկերությունն է կառավարում Ստամբուլի Աթաթուրքի անվան օդանավակայանը և տարեկան սպասարկում շուրջ 37 մլն ուղևորների:

 Ֆրանսիայի խորհրդարանում և Սենատում 1915թ. Հայոց ցեղասպանության մերժումը քրեականացնող օրինագծի ընդունումը, այնուհետ` Ֆրանսիայի Սահմանադրական դատարանի կողմից այդ օրինագծի հակասահմանադրական ճանաչելը, այնուհետ` կառավարության անունից կրկին նմանատիպ օրինագիծ Սենատ ներկայացնելու նախագահ Սարկոզիի խոստումը և հայությանն առնչվող այլ իրադարձություններ ենթադրում էին, որ Ֆրանսիա-Թուրքիա տնտեսական հարաբերությունները կարղ են որոշակի ետընթաց գրանցել, քանի որ Թուրքիան «վճռական» էր ֆրանսիական ընկերությունների նկատմամբ պատժամաիջոցներ կիրառելու հարցում:

Սակայն պարզվում է, որ Թուրքիայի օդային փոխադրումների «ամենահամեղ պատառը»` Ստամբուլի նոր օդանավակայանը, կլինի արդեն թուրք-ֆրանսիական TAV ընկերության ձեռքում :

Ֆրանսիան Հայոց ցեղասպանության հետ կապված խնդիրների ամենալարված շրջանում կարողացավ շուրջ 900 մլն դոլարի խոշոր գործարք կնքել Թուրքիայի հետ:

Զարմանալի է, սակայն Հայոց ցեղասպանության հարցը եվրոպական երկրներում բավականին եկամուտներ է ապահովում` այդ երկրների համար Թուրքիայի հետ խոշոր գործարքներ կնքելու առումով: Նույնը կարելի է ասել նաև ԱՄՆ-ի վերաբերյալ, քանի որ ԱՄՆ-ի կողմից Թուրքիային 100 հատ F-35 կործանիչների վաճառքի բանակցություններն սկսվեցին այն բանից հետո, երբ Հայոց ցեղասպանության վերաբերյալ բանաձևը քննարկվում էր Սենատի արտաքին հարաբերությունների հանձնաժողովում:

Այժմ Թուրքիան և ԱՄՆ-ը վերջնականապես համաձայնեցրել են 100 հատ F-35 կործանիչների վաճառքի պայմանագիրը:

ԱՄՆ-ի հայկական կազմակերպությունները վերջերս տեղեկացնում են, որ հայամետ սենատորները պատրաստվում են Հայոց ցեղասպանության հարցը կրկին ներառել Սենատի օրակարգում:

Չի բացառվում, որ ԱՄՆ-ը պատարաստվում է էլի ինչ-որ բան վաճառել Թուրքիային:

armweeklynews.am