Քեմալ Քըլըչդարօղլուի կարծիքով` Սվազի կոտորածն անտեսելը Թուրքիայի խայտառակությունն է

Թուրքիայի գլխավոր ընդդիմադիր Ժողովրդահանրապետական կուսակցության (ԺՀԿ) կուսակցության առաջնորդ Քեմալ Քըլըչդարօղլուն կուսակցության խորհրդարանական խմբակցության հավաքում հայտարարել է, որ Սվազում ալեվիների կոտորածի գործով կասկածյալներին չկալանավորելու եւ գործը ժամկետանց համարվելու հիմնավորմամբ կարճելու մասին դատարանի վճիռը Թուրքիայի խայտառակությունն է:

Ինչպես հաղորդում է «Արմենպրեսը»–ը` վկայակոչելով CNNTurk հեռուստաալիքը, Քըլըչդարօղլուն քննադատել է Թուրքիայի իշխանությունների ազդեցության տակ գտնվող դատական համակարգը եւ նշել, որ դատարանի այդ որոշումից այնպես է երեւում` կարծես Սվազի Մեդիմաքս հյուրանոցը հրդեհելու արդյունքում զոհված 37 մարդկանց եւ բազմաթիվ վիրավորվածների իրավունքները չեն խախտվել, եւ դա հանցագործություն չէ ընդհանրապես:

«Միջնադարում մարդկանց սպանում էին այրելով: Սվազում մարդկանց սպանեցին այրելով: Մարդասպանների մի մասն ամուսնացավ, բանակ գնաց, երեխաներին դպրոց ուղարկեց, բայց այդպես էլ չբացահայտվեց եւ չձերբակալվեց: Սա իշխող Արդարություն եւ զարգացում կուսակցության (ԱԶԿ) եւ Թուրքիայի խայտառակությունն է, քանի որ Սվազի դատական գործը հասցվեց ժամկետանց վիճակի ԱԶԿ-ի թողտվությամբ: Երեւի ԱԶԿ առաջնորդ Էրդողանն արդեն շփում է ձեռքերը, թե ինչ լավ եղավ, որ փակվեց Սվազի գործը», -թուրքական իշխանություններին ուղղված քննադատական խոսքում ասել է Քըլըչդարօղլուն:

Նշենք, որ թուրքական իշխանությունների թողտվությամբ ազգայնական շրջանակները 1993 թ. հուլիսի 2-ին հրդեհել են Սվազի Մեդիամաքս հյուրանոցն այն ժամանակ, երբ թուրքաբնակ ալեվիները (իսլամի շիա ուղղություն) հավաք էին անցկացնում այնտեղ: Հրդեհի  հետևանքով 37 մարդ է զոհվել: Կանխամտածված այդ կոտորածի կատարողներն ու պատվիրատուները չեն բացահայտվել: Անկարայում դատարանի այդ վճռի առթիվ այսօր` մարտի 13-ին բողոքի բազմահազարանոց ցույց է տեղի ունեցել:

http://armenpress.am/arm/news/683671/qemal-qylychdaroxlui-kartsiqov-svazi-kotoratsn-antesely.html