Փաստաթուղթ, որը փոխել է Դերսիմի պատմությունը

Համաձայն թուրքական “Ekonomi-haber” կայքի` հարուցված դատական գործի արդյունքում կառավարության պահոցում գտնված փաստաթուղթը լույս է սփռել Դերսիմի դեպքերի վերաբերյալ եղած պատմական սխալի վրա: Ըստ փաստաթղթի` Դերսիմի դեպքերը ավարտվել են ոչ թե 1938 թ., այլ` 1939 թ.: Փաստաթղթում տեղեկություն կա նաև առ այն, որ զինվորականների կազմակերպած գործողության ժամանակ խմբում երեխաներ էլ են եղել:

83 ամյա Ալի Դողանը Քաղաքացիական դատարան հայց է ներկայացրել այն հիմնավորմամբ, թե 1938 թ. Դերսիմի դեպքերի ժամանակ սպանել են իր 20 մերձավորին, այդ թվում` նաև մորն ու երկու եղբորը: Դողանը նաև պահանջել է իրենցից ներողություն խնդրել:

11 միլիոն 695 հազար լիրայի փոխհատուցում պահանաջող դատական գործը հարուցվել է պետությունը ներկայացնող նախագահական ատյանի դեմ:

Բացի այդ` հարցին առընչվող փաստաթղթերը դատարան ուղարկելու համար գրավոր դիմում էր ներկայացվել կառավարությանը, Ներքին գործերի նախարարությանը, Ազգային պաշտպանության նախարարությանը և շահագրգիռ կազմակերպություններին:

Կառավարությունը այս պահանջից հետո դատարան է ուղարկել հարցին առընչվող փաստաթղթերը:

Հանրապետության պահոցի փաստաթղթերից մեկը հայտնում է, որ Դերսիմի ռազմական գործողություններն ավարտվել են ոչ թե 1938 թ., ինչպես բոլորը գիտեն, այլ` 1939 թ.:

Փաստաբան Բարըշ Յըլդըրըմը ասել է. «Մինչև այսօր հայտնի էր, որ Դերսիմի ռազմական գործողությունները սկսել են 1937 թ. մայիսի 4-ի, Նախարարների խորհրդի որոշմամբ և տևել են մինչև 1938 թ., սակայն կառավարության Հանրապետական պահոցի 1939 թ. օգոստոսի 2-ով թվագրված գաղտնազերծված փաստաթղթի համաձայն` շարունակվել է մինչև 1939 թ.»:

Նախագահական նստավայրը դատարան ուղարկված փաստաթղթի հետ ծանոթանալու և պաշտպանվելու համար հավելյալ ժամանակ է պահանջել:

07.03.2012

Akunq.net