Ավստրալիայի Հոլոքոստի կենտրոնը կմասնակցի Հայոց ցեղասպանության մասին իրազեկման նախագծերին

Ավստրալիայի Հայ ազգային կոմիտեի տնօրեն Վարանդ Մկրտչյանը եւ Հոլոքոստի կենտրոնի տնօրեն Ուորեն Ֆայնբերգը  քննարկել են համատեղ նախագծերին առնչվող հարցեր, որոնք ուղղված են Հայոց ցեղասպանության վերաբերյալ Մելբուռնի բնակչության իրազեկության բարձրացմանը:

Ֆայնբերգը կոմիտեի պատվիրակությանը հրավիրել է Հոլոքոստի թանգարան, որտեղ 2010 թ-ից գործում է պատմաբան Դոնա Լի Ֆրիզի` Հայոց ցեղասպանության մասին աշխատանքների մշտական ցուցադրությունը, հաղորդում է Ավստրալիայի հայերի կայքը:

Հոլոքոստի կենտրոնի գործադիր տնօրենը խոստացել է նաեւ կոմիտեին ներգրավել Ցեղասպանության ուսումնասիրման առաջիկա նախագծերում:

«Մեզ ուրախացնում է պրն. Ֆայնբերգի պատրաստակամությունը` Հայոց ցեղասպանության մասին տեղեկությունները ներառելու Հոլոքոստի կենտրոնի կողմից իրականացվող ցուցահանդեսներում եւ նախագծերում: Մենք սերտորեն համագործակցելու ենք կենտրոնի հետ` վերջ դնելու համար ցեղասպանություններին»,-նշել է Հայ ազգային կոմիտեի Մելբուռնի գրասենյակի ներկայացուցիչ Հովիկ Մելքոնյանը:

http://news.am/arm/news/96057.html