Եւս մի ապտակ հայ-թուրքական արձանագրությունների կողմնակիցներին

Թուրքիայում և Եվրոպայի թուրք շրջանակներում լրջորեն շրջանառության մեջ են դրել UNESCO-ի հովանու ներքո 1915թ. ցեղասպանության հարցով պատմաբանների միջազգային հանձնաժողով ստեղծելու հարցը:

Նախկինում էլ տարբեր մակարդակներում թուրք գործիչները կարծիք էին հայտնում, որ օր առաջ անհրաժեշտ է որևէ միջազգային կառույցի շրջանակներում պատմաբանների հանձնաժողով ստեղծել և այդ ճանապարհով կասեցնել 1915-ի ցեղասպանության ճանաչումը երկրների խորհրդարանների կողմից:

Թուրքերը վստահ են, որ պատմաբանների հանձնաժողովի ստեղծումից հետո միչև 2015-ը կարելի է առկախել երկրների խորհրդարանների կողմից Հայոց ցեղասպանության ընդունումը, քանի որ կարելի է նրանց համոզել, որ սպասեն հանձնաժողովի եզրակացությանը:

Ֆրանսիայի Սահմանադրական դատարանի կողմից Հայոց ցեղասպանության ժխտումը քրեականացնող օրենքի հակասահմանադրական ճանաչումից հետո թուրքական կողմը նոր նախաձեռնություն է շրջանառում, որն ընդհանրապես ավելորդ և աղբարկղը նետելու ենթակա թղթի է վերածում հայ-թուրքական արձանագրությունները:

Այժմ թուրքական այն կիսակառավարական կազմակերպությունները, որոնք զբաղվում են եվրոպական երկրների խորհրդարաններում Հայոց ցեղասպանության հետ կապված օրենքների ընդունման դեմ լոբբիստական աշխատանքներով, կոչ են անում Թուրքիայի կառավարությանը շտապ պատմաբանների հանձնաժողով ստեղծել UNESCO-ի հովանու ներքո:

Փարիզ կենտրոնով Անատոլիայի մշակութային կենտրոն կազմակերպության նախագահ Դեմիր Յոնգերը հայտարարել է, որ Ֆրանսիայի Սահմանադրական դատարանի որոշումը յուրօրինակ շանս էր Թուրքիայի համար 2015-ից առաջ նախաձեռնությունն իր ձեռքը վերցնելու առումով: Նա Թուրքիայի իշխանություններին առաջարկել է ժամ առաջ UNESCO-ի հովանու ներքո պատմաբանների հանձնաժողով ձևավորել:

Այս կազմակերպությունն այն կազմակերպությունն է, որը հասարակական կազմակերպության դիմակի տակ ներկայացնում է թուրքական իշխանություններին Ֆրանսիայում: Անհրաժեշտ է լրջորեն վերաբերել այս մարտահրավերին, քանի որ Թուրքիան փորձում է քննարկել հայկական հարցը հայ-թուրքական արձանագրություններից դուրս, և այս պարագայում նա այլևս կարիք չունի վավերացնելու դրանք մինչև 2015-ը:

Հետաքրքիր է իմանալ, թե հիմա ինչ «երգ են երգելու» հայ-թուրքական արձանագրությունները գովերգող պալատական փորձագետները:

armweeklynews.am