Եվրամիության կոչը Թուրքիային

Եվրամիությունը կոչ է անում Թուրքիային` լուծել Կիպրոսի, քրդական և հայկական հարցերը:

Այս կոչի տեքստը վկայում է, որ Եվրամիությունը և Թուրքիան «մուկն ու կատու» են խաղում հայկական հարցի հետ:

Եվ ոչ մի անգամ պաշտոնապես չի հստակեցվում, թե ինչ է «Հայկական հարցը» Եվրամիության համար:

(Committee on Foreign Affairs http://www.europarl.europa.eu/pdfs/news/expert/infopress/20120227IPR39344/20120227IPR39344_en.pdf )

Վերջին տասը տարին Եվրամիությունը Թուրքիայի վերաբերյալ յուրաքանչյուր որոշման մեջ պարտադիր հիշատկում է հայերին, սակայն գործը տեղից չի շարժվում: Մարտի 1-ին Եվրախորհրդարանի Արտաքին գործերի հանձնաժողովը 54 կողմ և 7 դեմ ձայների հարաբերակցությամբ ընդունեց որոշում Թուրքիայի վերաբերյալ, ուր պահանջվում է նաև լուծել Կիպրոսի, քրդական և հայկական հարցերը:

Որոշման տեքստում միայն հիշատակվում է հայկական հարցի մասին, սակայն հետագա պահանջների և առաջարկությունների մեջ այն չի հստակեցվում: Եվրամիությունը փաստում է, որ անհրաժեշտ է ավելի սերտ համագործակցություն Եվրամիության և Թուրքիայի միջև Հարավային Կովկասում և կոչ է անում Հայաստանին և Թուրքիային բարելավել հարաբերությունները:

Թե էլ ինչ պետք է անի Հայաստանն այդ ուղղությամբ հայ-թուրքական արձանագրություններից հետո, պարզ չէ:Սակայն հայ-թուրքական միջպետական հարաբերությունները հայկական հարց չեն, որն առկա է Թուրքիայում: Հայկական հարցը 1915-ի ցեղասպանությունն ու ցեղասպանության հետևանքների վերացումն է, ինչը ոչ մի անգամ Եվրամիությունն ուղիղ ու բաց տեքստով չի պահանջում Թուրքիայից: Անգամ որպես Եվրամիության անդամության թեկնածու Թուրքիային ներկայացվող պահանջների և նախապայմանների մեջ չկա 1915-ի ցեղասպանության հարցը:

Եվրամիությունը շարունակում է Թուրքիայից պահանջել լուծել հայկական հարցը` առանց պարզաբանելու, թե ինչ է հասկանում այդ հարցի տակ, իսկ Թուրքիան ձևացնում է, որ այդ ուղղությամբ առաջընթաց է գրանցում: Քանի որ Եվրամիությունը հստակ չի ձևակերպել իր պահանջը, Թուրքիան էլ հստակ չի պատասխանում և գործնական քայլեր չի կատարում:

Երբ Եվրամիության ներկայացուցիչները որևէ առիթով հարցնեն Թուրքիային, թե ինչ եղավ հայկական հարցի լուծումը, Թուրքիան հանգիստ կարող է պատասխանել, որ լուծվում է: Եվրամիության համար հայկական հարցը բովանդակվել է ընդամենը երկու բառի մեջ` «Հայկական հարց»:

armweeklynews.am