Անհրաժեշտ է սթափ գնահատել իրավիճակը Թուրքիայում

Թուրքիայում առաջ է եկել նաև «մարտնչող ժողովրդավարներ» երիտասարդական շարժում, որը փորձում է դիմակայել ֆաշիստական, հակահայկական և հակաքրդական շարժումներին:

Մտածել, որ եթե Ստամբուլի Թաքսիմ հրապարակում փետրվարի 26-ին հավաքվել էին շուրջ երկու տասյակ հազար մարդ, և թուրք հասարակությունը կանգնել է ադրբեջանցիների ստի համար, ոչ միայն ճիշտ չէ, այլև` ինքնախաբեություն է:

Ադրբեջանի իշխանությունները, Թուրքիայում ադրբեջանական սփյուռքը, Թուրքիայի տարբեր համալսարաններում սովորող շուրջ 20 հազար ադրբեջանցի ուսանողները, Թուրքիայի ներքին գործերի նախարարությունը, ազգայնական և ֆաշիստական կազմակերպությունները, մեկ ամիս շարունակ նախապատրաստվելով և շուրջ 3 մլն դոլար ծախսելով, կարողացան Թաքսիմ հրապարակում փետրվարի 26-ին հավաքել ընդամենը 20 հազար մարդ:

Հիշեցնենք, որ նույնքան մարդ հավաքվել էր Հրանտ Դինքի հիշատակը հարգելու համար`կամավոր և առանց միլիոնավոր դոլարների:

 Սա իրականում Թուրքիայի և Ադրբեջանի «մեկ ազգ, երկու պետություն» գաղափարախոսության պարտությունն էր: Ստամբուլի հասարակությունը մերժեց թուրք-ադրբեջանական հակահայ գործնական դաշնությունը, իսկ մինչ օրս թուրքական մամուլը շարունակում է քննադատել փետրվարի 26-ի Խոջալուի հանրահավաքը և ֆաշիստական պաստառների բովանդակությունը:

Անգամ Թուրքիայի ներքին գործերի նախարարություն էր հանդես եկել պաշտոնական հայտարարությամբ, ուր անհաջող փորձ էր կատարել արդարացնել հանրահավաքի օրը նախարարի հակահայկական բնույթի ելույթը: Թուրքիայում փետրվարի 26-ից հետո առանձնակի վատ վերաբերմունք կա ադրբեջանցիների նկատմամբ:

 Ադրբեջանցիներն անկոչ հյուրի պես միջամտել են Թուրքիայում տասնյակ տարիներ շարունակվող «ազգայնականներ-ժողովրդավարներ» պայքարին, որին մասնակից են միլիոնավոր մարդիկ, և զոհ են գնացել տասնյակ հազարավոր քաղաքացիներ: Պատահական չէ, որ փետրվարի 26-ի դեպքերից ընդամենը երկու օր հետո ադրբեջանցիները փորձել են Խոջալուի դեպքերի հետ կապված միջոցառում անցկացնել Թուրքիայի Հաջեթեփե և Անկարա համալսարաններում և ենթարկվել մի քանի խումբ երիտասարդների հարձակմանը: Արդյունքում` միջոցառումները չեն կայացել, և մի քանի ուսանողներ հայտվել են հիվանդանոցում:

Անկարայում Ադրբեջանի դեսպանատան մամլո քարտուղարը հայտարարել է, որ հարձակվողները եղել են քրդեր և հայեր: Իրականում հարձակվողները եղել են ժողովրդավարության համար պայքարող թուրք ուսանողներ, որոնք այլևս չեն ցանկանում տեսնել ադրբեջանցի ուսանողների որևէ ակտիվություն և առավել ևս` լսել «Խոջալու» հեքիաթը: Ադրբեջանը Խոջալուով կարողացավ իր նկատմամբ ատելություն առաջացնել թուրք առաջադեմ երիտասարդության շրջանում, և անգամ բանը հասել է ձեռնամարտի: Եվ այդ արդյունքը Ալիևը ստացել է 3 մլն դոլարի դիմաց:

Արմեն Արազ

armweeklynews.am