Քրդերը ցանկանում են մայրենի լեզվով կրթություն ստանալ

Դիարբեքիրում առաջին անգամ տեղի է ունեցել «Քրդական ազգային լեզվի գիտաժողով», որին մասնակցել են Սիրիայում, Իրանում, Իրաքում, Եվրոպայում, Կովկասում և Կանադայում բնակվող շուրջ 200 քրդերենի մասնագետներ և լեզվաբաններ: Այս մասին հաղորդում է «Արմենպրես»–ը` վկայակոչելով թուրքական DHA լրատվական գործակալությունը:

Մասնակիցները, նախքան գիտաժողովի սկսվելը, 1 րոպե լռությամբ հարգել են ժողովրդավարության և անկախության համար կյանքը կորցրած քրդերի հիշատակը: Գիտաժողովի բացման խոսքը քրդերեն արած Ահմեդ Թուրքը իր խոսքում ասել է, որ իրենք ցանկանում են քրդերենն օգտագործել ամեն բնագավառում: «Ցանկանում ենք, որպեսզի քրդերենը դառնա կրթության, քաղաքականության պաշտոնական լեզուն: Տարիներ ի վեր քրդերենի նկատմամբ պետությունները ճնշումներ են գործադրել»,- ասել է նա: Ահմեդ Թուրքը քննադատել է Թուրքիայի փոխվարչապետ Բյուլենթ Արընչի հայտարարությունն այն մասին, որ քրդերենը քաղաքակրթության լեզու չէ և դրանով կրթությունն իրականացվել չի կարող:

Թուրքը, նշելով, որ ինքն արդեն 30 տարի է` պայքարում է ազատության և արժանապատիվ կյանքի համար, ասել է. «Հաղթանակը միասնությամբ է լինում: Կրոնի և քաղաքականության մեջ միասնությունն անչափ կարևոր է: Այս հարցում ստիպված ենք որոշ աշխատանքներ տանել: Այս օրը ոչ միայն լեզվի, այլև քաղաքական առումով քրդերի համար շատ կարևոր օր է»:

Դիարբեքիրում սկսված գիտաժողովը տևելու է 3 օր, քննարկվելու են քրդերեն լեզվի հետ կապված խնդիրներ:

http://armenpress.am/arm/news/682429/qrdery-cankanum-en-mayreni-lezvov-krtutyun-stanal.html