ՀԱՏԻԿ համշենական մշակույթի ուսումնասիրման և պահպանման միությունը շուտով մասնաճյուղ կբացի Անկարայում

ՀԱՏԻԿ համշենական մշակույթի ուսումնասիրման և պահպանման միությունը մտադիր է մասնաճյուղ հիմնել Անկարայում: Այդ նպատակով սույն թվականի փետրվարի 19-ին միության հիմնադիրներն այցելել են Անկարա և հանդիպել Թուրքիայի մայրաքաղաքում բնակվող համշենցիներին: Անկարայում գործող Արդվինի մշակույթի միության նախագահ Գյուրբյուզ Աքյուզի կողմից այստեղի Վեդաթ Դալոքոյ սրահում կազմակերպված երեկույթին Ստամբուլից մասնակցել են ՀԱՏԻԿ միության նախագահ Մեհմեդ Ալթունքայան, գլխավոր քարտուղար Հիքմեթ Աքչիչեքը, ինչպես նաև` միության անդամներ և մի շարք համշենցի գործարարներ:

Երեկույթին բացման խոսքով է հանդես եկել Լեման Քարաիբրահիմօղլուն, որի ելույթը եղել է համշեներենով: Ելույթ է ունեցել նաև Արդվինի մշակույթի միության նախագահ Գյուրբյուզ Աքյուզը, ով իր խոսքում նշելով, թե նման կազմավորումների շրջանակներում ուսումնասիրություններ են կատարվելու համշենցիների ավանդույթների, սովորույթների և լեզվի ուղղությամբ, ասել է, թե իրենք մերժում են ցեղապաշտության այն գաղափարները, որ ոմանք փորձում են վերագրել համշենցիներին, և առանց այդ էլ վերջին ցուցանիշները թույլ չեն տալիս այդպես վարվել, և որ Խոպայում ձախակողմյան ընտրողների բարձր ցուցանիշները մատնանշում են, որ այստեղի մարդիկ դեմ են շովինիստական, ցեղապաշտական և ազգայնական գաղափարներին: Նա նաև կոչ արեց ոչ մեկից չվախենալ, վախեցողներին էլ` տեր կանգնել իրենց մշակույթին և ավանդույթներին: Գյուրբյուզ Աքյուզը հայտնել է նաև, որ Ստամբուլում հիմնված ՀԱՏԻԿ միությունը հենց այդ գաղափարի հիման վրա է ստեղծվել: Արդվինի մշակույթի միության նախագահը շնորհակալություն է հայտնել ՀԱՏԻԿ միության հիմնադիրներին և անդամներին` երեկույթին մասնակցություն ցուցաբերելու համար և հույս հայտնել, որ նման միջոցառումները շարունակական բնույթ կկրեն:

Շուրջ 300 հոգու մասնակցությամբ կայացած երեկույթին համշեներենով և թուրքերենով խաղիկներ են հնչել` «Վովա» համույթի, Հիքմեթ Աքչիչեքի, Շաֆաք Մուրադ Շահինի, Մեվլութ Աքչիչեքի և Այգյուն Աքչիչեքի կատարմամբ ու սրնգի և պարկապզուկի նվագակցությամբ:

Երեկույթի շրջանակներում ելույթ է ունեցել նաև ՀԱՏԻԿ համշենական մշակույթի ուսումնասիրման և պահպանման միության նախագահ Մեհմեդ Ալթունքայան, ով ներկաներին է փոխանցել ՀԱՏԻԿ միության ղեկավար խորհրդի անդամների ողջույններն ու հարգանքի հավաստիքը: Մեհմեդ Ալթունքայան խոսքում նաև նշել է. «Սիրելի’ համշենցիներ, «Միասնությունն ուժ է ծնում» գաղափարից ելնելով` հիմնեցինք նաև ՀԱՏԻԿ համշենական մշակույթի ուսումնասիրման և պահպանման միությունը: Մաղթում ենք, որ այդ հուզմունքն ապրեք նաև դուք` Անկարայում բնակվող մեր համշենցի եղբայրները: Մենք քաղաքական հարթակում, լինի ձախակողմյան թե աջակողմյան, տարբեր և իրարից անկախ գործունեություն ծավալող անձինք ենք: Սակայն մեր մասնավոր խնդիրը եղող մեր լեզվի և մշակույթի առնչությամբ պետք է միասին գործենք: Հնարավորինս կարճ ժամանակահատվածում ՀԱՏԻԿ միության ցուցանակը նաև Անկարայում տեսնելու հույսով սերս ու հարգանքս եմ փոխանցում բոլորիդ»:

Մեհմեդ Ալթունքայայից հետո ելույթ է ունեցել նաև ՀԱՏԻԿ միության գլխավոր քարտուղար Հիքմեթ Աքչիչեքը: Նրա խոսքը եղել է համշեներենով: Հիքմեթ Աքչիչեքը ելույթում շեշտել է լեզվի և մշակույթի պահպանման կարևորությունը` որպես ինքնության պահպանման անփոխարինելի միջոցներ:

Միջոցառումը կազմակերպել են Սայիմ Ալթունքայան, Յուջել Ջիհանը, Ալի Չիվելեքը և Քազիմ Ջանջին:

01.03.2012

Akunq.net