Փոքրամասնությունների դպրոցներ այլևս կարող են հաճախել նաև Թուրքիայի Հանրապետության քաղաքացիները չեղող անձանց երեխաները

Թուրքիայի ազգային կրթության նախարարությունը հանդես է եկել փոքրամասնությունների դպրոցներին վերաբերող նոր նախաձեռնությամբ: Թուրքական «Աքշամ» օրաթերթի փոխանցմամբ` նախարարության մշակած նախագիծը կարևոր փոփոխություններ է ներառում, ըստ որոնց` Թուրքիայի Հանրապետության քաղաքացի չեղող անձանց երեխաները ևս կկարողանան հաճախել ազգային փոքրամասնություններին պատկանող դպրոցներ: Խոսքը բնականաբար վերաբերում է Թուրքիայում փախստականի կարգավիճակում բնակվողներին: Աղբյուրի համաձայն` այդ խնդիրը լուծելու համար փախստականները մինչ այդ դիմել են տարբեր միջոցների: Այսպես, օրինակ, անցած ամիսներին հայտնաբերվել է, որ Ստամբուլում որպես փախստական ապրող հայերը մի դպրոց են հիմնել տեղի եկեղեցիներից մեկում:

Փոքրամասնության դպրոցներից մեկում աշխատող Ալաադդին Դինչերի պատրաստած զեկույցի համաձայն` 1964-1965 թթ. փոքրամասնությունների դպրոցներում են սովորել շուրջ 20 հազար աշակերտներ: Այդ թիվը վերջերս խիստ նվազել է` 2010-2011 ուստարում հասնելով 3.300-ի: 2010-2011 թթ. տվյալներով` պոլսահայերին պատկանող 23 դպրոցներում սովորել են 2.596 հոգի, աշխատել` 500 ուսուցիչ: Հունական համայնքին պատկանող 19 դպրոցներում ուսանել են 196 աշակերտներ, դասավանդել` 65 ուսուցիչներ: Ինչ վերաբերում է հրեական փոքրամասնությանը, ապա նշված ժամանակահատվածում այստեղի հրեաներին պատկանող 2 դպրոցում սովորել են 523 երեխաներ, աշխատել` 73 ուսուցիչներ:

31.01.2012

Akunq.net