Ազիզ Դաղջը. «Դավանափոխ հայերն էլ են մեր եղբայրները»

Սասունի հայերի միության նախագահ Ազիզ Դաղջըն, միություն, որի կենտրոնը գտնվում է Ստամբուլում, հայտարարել է, թե մուսուլմանացած և «դյոնմե» (դավանափոխ) հայերը նույնպես իրենց եղբայրներն են: «Սասունցիները, սվասցիները (սեբաստացիները), արևելցիները, դյոնմե հայերը` բոլորն էլ մեր եղբայրներն են»,-ասել է Դաղջըն:

«249 տարով էլ լինի…»

«Բաթման չաղդաշ» անկախ քաղաքական թերթի հաղորդմամբ` Ազիզ Դաղջըն շեշտելով, թե իրենք շարունակելու են պայքարը Ստամբուլի Իսթիքլյալ պողոտայում գտնվող Թոքաթլըյան խանի և գործարար կենտրոնի համար, այդ մասին ասել է. «Այդ պատմական խանը եթե անգամ ոչ թե 49, այլ 249 տարով էլ վարձու տրվի, մենք շարունակելու ենք մեր պայքարը»:

Դաղջըն հայտնելով, որ իրենք շարունակելու են պայքարը նոր օրենքի շրջանակներում, որով Վճռաբեկ դատարանը տվյալ գույքը ճանաչել է որպես հայերի սեփականություն, նաև նշել է. «Ոմանք աչք են տնկել Իսթիքլյալ պողոտայում գտնվող պատմական խանի և գործարար կենտրոնի վրա: Այդ նշանավոր կառույցին տեր դառնալ ցանկացողները շատ են: Սակայն մենք դա երբեք թույլ չենք տա: Մեր նպատակն է այդ պատմական վայրի եկամուտները թափանցիկ դարձնել բոլոր հայերի համար: Այդ եկամուտների մասին պետք է տեղեկացվի Պոլսո ողջ հայկական համայնքը: Թույլ չենք տա, որ այն ընծայվի, ինչպես որ արվել է մինչ այժմ: Մենք կշարունակենք մեր իրավական պայքարը»:

«Բոլորին եղբայր ենք»

Դաղջըն ընդգծելով, թե իրենք երբեք տարբերություն չեն դրել հետագայում մուսուլմանացած և «դյոնմե» կոչված հայերի և քրիստոնյա հայերի միջև, հավելել է. «Թուրքիայի բոլոր հայերն են մեր եղբայրները` լինեն սասունցի, սվասցի, ադըյամանցի թե արևելցի: Հո չենք վիճելու նրանց հետ, որ մուսուլման են: Մենք ոչ մեկի հետ ոչ մի խնդիր չունենք: Ասվում է, թե մենք դյոնմե հայերին Երեք խորան եկեղեցու անդամ ենք դարձրել: Նման բան չի եղել: Անարդարացի քննադատությունների ենք ենթարկվել, որովհետև ընտրությունների ժամանակ աջակցել ենք դեղին ցանկը գլխավորողին` Մուրադ Բաշթեփեին: Մինչդեռ մեր նպատակն էր մեկ տանիքի տակ մեկտեղել Թուրքիայի ողջ հայությանը: Սակայն ափսոս, որ մեր կազմավորումը ոմանց հաշիվներին խանգարում է: Գոյություն ունեն անձինք, ովքեր չեն ուզում, որ հայտնի դառնա Իսթիքլյալ պողոտայում գտնվող Թոքաթլըյան պատմական խանի` միլիոն թուրքական լիրայի չափով եկամուտը: Մենք միշտ շարունակելու ենք մեր պայքարը նրանց դեմ»:

«Շրջանը կդառնա զբոսաշրջության դրախտավայր»

Անընդմեջ Ստամբուլից Սասուն գնացող-եկող Սասունի հայերի միության նախագահ Ազիզ Դաղջըն Թուրքիայի մշակույթի և զբոսաշրջության նախարարության դեմ դատական գործ էր հարուցել` 2973 մ բարձրություն ունեցող Մարութա լեռան գագաթին գտնվող եկեղեցու դուռը գողանալու մեղադրանքով: Դաղջըն, որը հայտնել է, թե իրենք շարունակելու են աշխատանքները` Հալեպից բերված և 3 տոննա կշռող այդ դուռը գտնելու ուղղությամբ, դատական գործ է հարուցել նաև Քոզլուքի գավառապետարանի դեմ, քանի որ իրեն թույլ չեն տվել գյուղ մտնել` պատճառաբանելով, թե հիշյալ գավառի մոտակայքում գտնվող եկեղեցում հարստությունների գրանցման աշխատանքներ են կատարվում: Դաղջըն, ուշադրություն հրավիրելով այն բանի վրա, որ անհրաժեշտ է պահպանել շրջանի եկեղեցին և գերեզմանոցները, ասել է. «Եթե մեր եկեղեցիները պահպանության տակ առնվեն, Թուրքիայի արևելքը և հարավ-արևելքը դրախտավայր կդառնան զբոսաշրջության համար»:

http://batmancagdas.com/donme-ermeniler-de-kardesimiz.htm

Թարգմանեց Մելինե Անումյանը

Akunq.net