Քրդերը կոտորված 34 գյուղացիների համար Հաագայի դատարան են դիմել

Թուրքիայի օդուժի կողմից դեկտեմբերի 28-ին կոտորված 34 քուրդ գյուղացիների հարցը Թուրքիայի քրդական Խաղաղություն եւ ժողովրդավարություն կուսակցությունը տեղափոխել է Հաագայի միջազգային դատարան։

Թուրքական İnternethaber-ի փոխանցմամբ՝ քրդական կուսակցության խորհրդարանական խմբակցության փոխնախագահ Հասիփ Քափլանը հայտարարել է, թե Ուլուդերեյում կոտորված 34 գյուղացիների հարցով արդեն դիմել են Հաագայի միջազգային դատարան՝ հիշեցնելով, որ նույն հարցով արդեն խոսել են ՄԱԿ-ի մարդու իրավունքների հանձնաժողովին։ 

Քուրդ պատգամավորը նշել է, թե միջազգային դատարան ուղարկված հայցում ներառվել են լուսանկարները, քաղաքական կուսակցությունների արձագանքները, լրատվամիջոցների հրապարակումներն ու դատաբժշկական փորձաքննության պատասխանները։

Նշենք, որ դեկտեմբերի 28-ի երեկոյան Թուրքիայի օդուժերին պատկանող F-16 կործանիչները ռմբակոծել են Իրաքից Թուրքիա մաքսանենգ ապրանք ներկրող մի խմբի:

Ռմբակոծության հետեւանքով սպանվել է 34 քուրդ գյուղացի: Անկարան նշել է, թե քաղաքացիական անձանց շփոթել են PKK-ի զինյաների հետ եւ հարվածել նրանց:

http://news.am/arm/news/90948.html