Թուրքիայում երկու հազար անհայտ կորած մարդ կա

Թուրքիայի խորհրդարանի մարդու իրավունքների հանձնաժողովում ներկայացրած հաշվետվության մեջ այդ երկրի Մարդու իրավունքների հիմնադրամի (TIHV) ղեկավարման խորհրդի անդամ Ջոշքուն Ուսթերջին նշել է, որ 1990-2011 թթ. հաշվարկով Թուրքիայում 2000 անհայտ կորածներ, չբացահայտված հանցագործություններ կան:

Ինչպես հաղորդում է «Արմենպրես»–ը` վկայակոչելով CNNTurk հեռուստատեսությունը, Ուսթերջին հայտնել է, որ եթե 1992-1993 թթ. անհայտ կորածների դոսյեներն անհապաղ չհետաքննվեն, ապա ժամկետանց լինելու պատճառով այդ գործերը կվերացվեն:

Թուրք իրավապաշտպանը նշել է, որ թուրքական պետությունը մարդու իրավունքների ոտնահարումները գրանցելու շուրջ մինչ այժմ որեւէ աշխատանք չի կատարել: Նա ասել է, որ Թուրքիայում մարդու իրավունքների ամենաշատ ոտնահարումները եղել են 1990-1994 թվականներին: «Այդ տարիներին բազմաթիվ անհայտ կորածներ, չբացահայտված հանցագործություններ, առանց դատավարության սպանություններ, կալանավայրերում եւ բանտերում սպանվածներ կան», -ասել է նա` նշելով, որ այդ բոլորը կապված են քրդական խնդրի հետ: «Երբ պետությունը ղեկավարվում է հակապարտիզանական եւ ռազմական մեթոդներով, սկսվում են տեղի ունենալ մարդու իրավունքների ծանր հանցագործություններ», -հավելել է նա:

Armenpress.am