“Դերսիմի իրադարձությունների մասին բանավեճերում Սաբիհա Գյոքչենի անվան շահարկումը պայմանավորված է նրա` հայազգի որբ լինելու հանգամանքով”. Այշե Հյուր

Թուրքական “Հաբերթյուրք” հեռուստաալիքով ցուցադրվող “Խոսքը քոնն է” հաղորդման ժամանակ հայտնի լրագրող և պատմաբան Այշե Հյուրը Սաբիհա Գյոքչենի վերաբերյալ հանդես է եկել ուշագրավ մեկնաբանությամբ: www.gundemvatan.com կայքէջի հաղորդմամբ` Այշե Հյուրը կարծիք է հայտնել, թե Դերսիմի դեպքերի առնչությամբ Սաբիհա Գյոքչենի անվան հաճախակի հիշատակումը պայմանավորված է նրա հայ ինքնությամբ: Թուրքական պաշտոնական պատմագրության դեմ իր օբյեկտիվ դիտարկումներով հայտնի պատմաբանը մասնավորապես ասել է. “Դերսիմի իրադարձությունների կապակցությամբ արվող բանավեճերում Սաբիհա Գյոքչենի անվան շահարկումը, ըստ իս, պայմանավորված է նրա` հայազգի որբ լինելու հանգամանքով”:
Հիշեցնենք, որ աշխարհի առաջին կին ռազմական օդաչուն և Թուրքիայի առաջին կին օդաչուն եղած Սաբիհա Գյոքչենը Մուստաֆա Քեմալ Աթաթուրքի հոգեդուստրն է, որին վերագրում են հայկական ծագում: Որոշ աղբյուրների համաձայն` Սաբիհա Գյոքչենի իրական անունն է եղել Հաթուն Սիբիլջիյան:

27.01.2012
Akunq.net