Սենատորներին կաշառելու ձախողված փորձից հետո հիմա էլ պատմաբաններն են թիրախ

Թուրքիան Ֆրանսիայի Սահմանադրական դատարան դիմելու համար լոբբիստական ֆիրմա էր վարձակալել:

Լոբբիստական ֆիրմա վարձակալելը նույնն է, թե օրինական ճանապարհով փորձել կաշառել սենատորներին:

 Ֆրանսիայի Սենատում հունվարի 23-ի քվեարկումից հետո, երբ հաստատվեց Հայոց ցեղասպանության ժխտումը քրեականացնող օրինագիծը, թուրքերն իրենց ողջ ուժերը նետել էին անհրաժեշտ 60 սենատորների ստորագրահավքի ուղղությամբ, որպեսզի օրինագծի սահմանադրականությունը վիճարկվի Սահմանադրական դատարանում: Ինչպես տեղեկացրել է Թուրքիայի Պալատների և բորսաների միության նախագահ Ռիֆաթ Հիսարըջըկօղլուն, միության պաշտոնական կայքում տեղեկություն է տեղադրել այն մասին,որ ներկայում ինքը և մի քանի այլ առևտրաարդյունաբերական պալատների ղեկավարներ գտնվում են Փարիզում և իրենց կողմից վարձակալած լոբբիստական մի ֆիրմայի հետ փորձում են Ֆրանսիայի Սահմանադրական դատարան դիմելու համար անհրաժեշտ 60 ստորագրություն հավաքել սենատորներից: Այժմ արդեն իսկ պարզ է, որ հարցը Սահմանադրական դատարան չի մտնի, և անհրաժեշտ քանակությամբ ստորագրություններ չեն հավաքվել:

Սակայն պարզվում է, որ այդ լոբբիստական ֆիրման թուրքական կողմի համար գործել է դեռևս 2011թ. ողոջ ընթացքում և նա է կազմակերպել եվրոպաբնակ թուրքերի ցույցերն ու երթերը 2011թ. դեկտեմբերի 23-ին և 2012թ-ի հունվարի 21-ին Փարիզում: Ավելին, այս ֆիրման է ակտիվորեն աշխատել ֆրանսիացի սենատորների հետ, որպեսզի նրանք դեմ քվեարկեն Հայոց ցեղասպանությանը վերաբերող օրինագծին: Թուրքական գործարարների միությունները և վարձակալված լոբբիստական ֆիրման պարտություն կրեցին:

Այժմ, համաձայն միությունների հայտարարության, նրանք պատրաստվում են 2015-ին ընդառաջ ոչ թե լոբբիստական ֆիրմաներ վարձել, այլ ` գիտահետազոտական ինստիտուտ հիմնել, որին կարող են անդամագրվել և հետազոտություններ իրականացնել աշխարհի հայտնի պատմաբանները, որոնք հետաքրքված են ոչ միայն 1915-ի Հայոց ցեղասպանությամբ, այլ նաև` Օսմանյան կայսրության պատմությամբ: Ասել կուզի` հիմա էլ` սենատորների կաշառման անհաջող փորձից հետո, պատրաստվում են պատմաբաններին ֆինանսավորել:

27.01.12

http://www.armweeklynews.am/awn/12/am_1126.htm