Ներկայում ռազմատենչ թուրք պատմագիտությունը հայերի դեմ իրականացրած ջարդերի նկատմամբ վարում է մերժողական քաղաքականություն և բոլոր արխիվային փաստաթղթերում թաքցնում է կատարված իրողությունը: Այս եզրակացությունն է հնչեցնում թուրքական «Ռադիկալ» թերթի վերլուծաբան Յալչըն Չաքմաքը` անդրադառնալով Թուրքիայում ազգային փոքրամասնությունների նկատմամբ իրականացված քաղաքականությանը, հաղորում է «Արմենպրեսը»:
«Այսօր հազվադեպ կարելի է հանդիպել տեղացի կամ էլ Թուրքիայում բնակվող օտարերկրյա այնպիսի գիտնականների, որոնք կբարձրաձայնեն հայերի հետ կատարված դեպքերը: Բարձրաձայնողներին էլ լուրջ վտանգ է սպառնում թե’ աշխատանքային հետագա գործունեության առումով, թե’ Թուրքիայում ապահով բնակվելու տեսանկյունից: Գիտական համարվող թուրքական համալսարանների կողմից իրենց ակադեմիական անձնակազմին տրվում է մի պայման. այն է` դուրս չգալ հստակ ընդգծված պետական դիրքորոշման շրջանակներից»,- նշում է Չաքմաքը:
Հեղինակը նշում է, որ 20-րդ դարից մինչ օրս որպես թուրքական ինքնության ամենամեծ թշնամիներ են ըմբռնվել հայերն ու քրդերը: Իթթիհատականների կողմից հայերի կոտորածներով սկսված այս գործընթացը շարունակվեց քրդերի դեմ նախաձեռնած ջարդերով:
«Ցավալի է ճանաչված չլինել և մթության մեջ մեռնել: Այս մթությունը լուսավորելը պատմական ուսումնասիրությունների պատիվն է»,- նշում է «Ռադիկալը»` ողջունելով հայերի դեմ հանցանքների համար Դիարբեքիրի նահանգապետ Օսման Բայդեմիրի ներողություն խնդրելը` դեպքերին առերեսվելու տեսանկյունից:
Armenpress.am
Leave a Reply