Ֆրանսիային թողեք, դուք Թուրքիային նայեք

Թուրքիայում հանրապետական դատախազությունը քրեական գործ է հարուցել լրագրողի դեմ «ցեղասպանություն» բառն արտասանելու համար:

Թուրքիայի հանրապետական դատախազ Լեվենտ Սավաշը հայտարարել է, որ լրագրող Թեմել Դեմիրերի դեմ դատական գործ է հարուցված Թուքիայի Քրեական օրենսգրքի 301-րդ և 216/1 հոդվածներով` Թուրքիայի հանրապետությունը նսեմացնելու մեղադրանքով: Այս մասին տեղեկացնում է թուրքական Թարաֆ օրաթերթը:

Անկարայի առաջին ատյանի դատարանը 301 հոդվածով լրագրողի քննության գործի շարունակության որոշում է ընդունել: Թեմել Դեմիրերը մեղադրվում է այն բանում, որ 2008թ-ի հունվարի 20-ին, Հրանտ Դինքի սպանության միամյակին հայտարարել է. «Հրանտին միայն հայ լինելու համար չէ, Հրանտին այս երկրում տեղի ունեցած իրականությունը բացատրելու համար են սպանել… Այո , այս երկրում ցեղասպանություն է կատարվել»: Ահա այս հայտարարության համար, որտեղ օգտագործվել է “ցեղասպանություն “ բառը, հայտնի լրագրողը կկանգնի դատարանի առաջ:

Եվ սա այն դեպքում, երբ Թուրքիայի նախագահը, արտգործնախարարաը ողջ աշխարհով մեկ վայնասուն են բարձրացրել, որ ֆրանսիացիները Հայոց ցեղասպանության ժխտումը քրեականացնող օրենքով սահմանափակում են խոսքի և ազատ արտահայտվելու իրավունքը:

Թուրքիան մնում է միջնադարյան երկիր, չնայած որ նրա ղեկավարությունը երբեմն ֆրակ է հագնում պաշտոնական ընդունելությունների ժամանակ:

26.01.12

http://www.armweeklynews.am/awn/12/am_1121.htm