ԵԽԽՎ-ում կրկին բարձրացվել է ադրբեջանական վանդալիզմի հարցը

Եվրոպայի խորհրդի խորհրդարանական վեհաժողովում հունվարի 25-ին կրկին բարձրացվել է Ջուղայում հայկական մշակութային ժառանգության ոչնչացման հարցը: Այս մասին Ստրասբուրգից «Արմենպրես»-ին տեղեկացրեց ԵԽԽՎ-ում հայկական պատվիրակության անդամ, ԱԺ եվրաինտեգրման հարցերի մշտական հանձնաժողովի նախագահ Նաիրա Զոհրաբյանը:

Նրա փոխանցմամբ ՝ վեհաժողովի քննարկման հիմնական թեման եղել է Բելառուսում մարդու իրավունքների ոլորտում տիրող իրավիճակը: Քննարկումներին զուգահեռ` ԵԽԽՎ շենքի դիմաց ցուցարարներ են եղել, ովքեր հանդես էին գալիս Բելառուսում տիրող իրավիճակի դեմ:

Հարցի առնչությամբ ելույթ է ունեցել նաև Նաիրա Զոհրաբյանը, ով նշել է, որ հնարավոր չէ հերքել Բելառուսում մարդու իրավունքների ոլորտում առկա խնդիրները: Նրա կարծիքով՝ ամենակարևոր խնդիրը, որին պետք է ուշադրություն դարձնի Բելառուսը, մահապատժի մորատորիումն է, որն անպայմանորեն պետք է հայտարարվի:

«Սակայն ակնհայտ է, որ Եվրոպայի խորհրդում գործում են երկակի ստանդարտները: Նույն Ադրբեջանում մարդու իրավունքների, ժողովրդավարության, խոսքի ազատության վերաբերյալ տիրող իրավիճակը շատ ավելի վատ է, քան Բելառուսում, սակայն այստեղ համարձակություն չկա այդ  մասին խոսելու»,- եվրոպացի պատվիրակներին հիշեցրել է Զոհրաբյանը: Նա շեշտել է, որ Ադրբեջանն արդեն քանի ամիս է թույլ չի տալիս, որ Եվրոպայի խորհրդի քաղաքական բանտարկյալների հարցով զեկուցողը մուտք գործի այդ երկիր, իսկ վեհաժողովը համարձակություն չի դրսևորում Ադրբեջանի հանդեպ որևէ քայլ կիրառելու:

Վեհաժողովում կազմավորվել է դիտորդական առաքելություն, որը պետք է մեկներ Ջուղա` տեղում տեսնելու ադրբեջանական վանդալիզմը:

Զոհրաբյանը նշել է, որ Եվրոպայի խորհրդում կան երկրներ, որոնք, ըստ էության, կարող են իրենց բաժին ժողովրդավարությունը գնել նավթով կամ որևէ այլ արտարժույթով: «Ես նշեցի, որ եթե ԵԽԽՎ-ն չի ցանկանում հիմնավորապես շեղվել իր հիմնարար արժեքներից, ապա լրջորեն պետք է վերանայի իր մոտեցումը և հավասար վերաբերմունք ունենա բոլոր երկրների հանդեպ՝ անկախ նրանից` այդ երկրները նավթ ունեն, թե չէ»,- ասաց պատգամավորը:

http://armenpress.am/arm/print/676936/ա