Թուրքիայի առաջին տիկինը յուրովի է արձագանքել Հայոց ցեղասպանության ժխտումը քրեականացնող օրինագծի ընդունմանը

Թուրքիայի առաջին տիկին Հայրունիսա Գյուլը յուրովի է արձագանքել Ֆրանսիայի Սենատի կողմից Հայոց ցեղասպանության ժխումը քրեականացնող օրինագծի ընդունմանը: Ինչպես հաղորդում է ադրբեջանական SalamNews գործակալությունը, Հայրունիսան օրինագծի ընդունումից հետո ճաշի է հրավիրել Թուրքիայում հավատարմագրված կին դեսպաններին, դեսպանների կանանց, միջազգային կազմակերպությունների (այդ թվում՝ՄԱԿ–ի, ԵՄ–ի) կին աշխատակիցներին. միջոցառմանը ներկա չի եղել միայն Թուրքիայում Ֆրանսիայի դեսպանի կինը:

Թուրքական «Անադոլու» գործակալությունը հաղորդում է, որ Հայրունիսան Անկարայում Ֆրանսիայի դեսպանի կնոջը՝ Սաբինե Բիլիին ճաշի չի հրավիրել ի նշան Հայոց ցեղասպանության ժխտումը քրեականացնող օրենքի ընդունման դեմ բողոքի։

Ֆրանսիայի Սենատը հունվարի 23–ի լույս 24–ի գիշերը ձայների 127 կողմ և 86 դեմ հարաբերակցությամբ ընդունեց ցեղասպանությունների ժխտումը քրեականացնելու մասին օրինագիծը (օրինագիծը վերաբերում է Ֆրանսիայի կողմից ճանաչված ցեղասպանությունների ժխտման քրեականացմանը։ Ֆրանսիան, Հայոց ցեղասպանությունից բացի, ճանաչել է նաև հրեաների ցեղասպանությունը՝ Հոլոքոստը, որի ժխտումն արդեն իսկ քրեականացված է Ֆրանսիայում):

Նոր օրինագծի համաձայն՝ Ֆրանսիայում Հայոց ցեղասպանությունը ժխտողներին 1 տարվա ազատազրկում է սպառնում և 45.000 եվրո տուգանք։

http://tert.am/am/news/2012/01/26/gulwife/